Platforma Ked û Demokrasiyê ji bo şermezarkirina êrîşên li ser dibistanan, li Karşiyakayê daxuyaniyek dan. Di daxuyaniyê de hat diyar kirin ku tevî ewqas xwîn hat rijandin jî wezîrê perwerdeyê hîn li cihê xwe ye, divê rojek berî rojekê îstifa bike.
Platforma Ked û Demokrasiyê ya Karşiyakayê, ji bo êrîşên li ser dibistanên Riha û Mereşê şermezar bike, ji ber ÎZBANa Karşiyakayê heta ber dergehê çarşiyê meşiya. Di meşê de pankarta “Di perwerdehiyê de ji şîdetê re na! Dibistana bêşîdet, civaka bi rûmet” hat hildan û dirûşmên “Yûsûf Tekîn ê wezîrê terîqetan îstifa”, “Dibistana ewle, pêşeroja ewle” û “Em teslîmî tarîtiyê nabin” hatin berzkirin.
‘Canê her kesî di xetereyê de ye’
Metna daxuyaniyê li ser navê platformê ji aliyê Zeliha Danyelî ve hat xwendin. Zelîha Danyelî bal kişand ser êrîşên li Riha, Mereş û Zanîngeha Egeyê û pirsî: “Gelo ciwanên me çawa ketin vê rewşê?” Zelîha Danyelî destnîşan kir ku berpirsê sereke desthilatdar e û got: “Li vî welatî îro canê jinan, zarokan, mamosteyan û kedkaran di xetereyeke mezin de ye. Lê bela herî mezin ev pergal bi xwe ye; pergala ku şîdetê wek nan û avê asayî dike, rê li ber sûcan vedike û ciwanan bê hêvî dihêle. Zarokên ku îro dikevin nava sûcan, ne bi tesadufî lê bi zanebûn di nava vê heriyê de tên hiştin. Gava krîza aborî kûr dibe, birçîbûn û xizanî serî hildide, cihê dewletê mafya û çete digirin. Dewleta ku hemû hêza xwe daye ser serkutkirina muxalefetê, di warê perwerdehiyê de jî civak riziyandiye.”
‘Divê wezîr demildest dest ji kar berde’
Zelîha Danyelî diyar kir ku desthilatdar li şûna zarokan, wezîrê xwe diparêze, wezîrê ku ji roja destpêkê ve pişta xwe daye derdên gel û perwerde kirye firoşgeha terîqetan, bi projeyên mîna ÇEDES û MESEMê re karesatan diafirînîne û got: “Tevî ku evqas xwîn hatiye rijandin, rûniştina wî ya li ser wê kursiyê şerm e; divê tavilê îstifa bike. Jiyana zarok û mamosteyên me ne ewqas erzan e! Pêwîst e dibistan ne cihê xwînê, bibe cihê jiyan û hêviyê. Êdî kêr gihîştiye hestî. Ji bo ku ev êşên li Sêwreg, Mereş û her derê welat careke din neqewimin, em ê wek Platforma Karşiyakayê heta dawiyê têkoşîna xwe bimeşînin.”
