Serokê Çînê Xî Jînpîng bê ku nav bide bertek nîşanî biryara Amerîkayê da û xwest ku rêz ji serweriya welatên Kendavê re bê girtin.
Serokê Dewleta Çînê Xî Jînping, di dema ku rageşiya li herêmê di lûtkeyê de ye, bangeke krîtîk li civaka navneteweyî kir. Xî Jînpîng daxwaz kir ku rêz li “serwerî, ewlehî û yekrêziya axa” welatên Kendavê bê girtin û ji bo aramiya Rojhilata Navîn planeke ji 4 xalan pêk tê pêşkêş kir.
Xî Jînpîng bi Mîrê Abu Dabiyê re axivî
Li gorî nûçeyên medyaya dewletê ya Çînê, Xî Jînpîng bi warisê textê Abu Dabiyê Mihemed bin Zayed Al Nahyan re hevdîtinek pêk anî. Di vê hevdîtinê de Xî Jînpîng bal kişand ser bingeha aştiyê û destnîşan kir ku divê hemû welat li gorî hiqûqa navneteweyî tevbigerin da ku pêşî li karesatên nû were girtin.
Plana 4 xalên Pekînê
Xî Jînpîng di çarçoveya pêşniyara xwe ya ji bo aramiya herêmê, ev çar prensîbên sereke destnîşan kir: “Divê rêz ji serweriya welatên Kendavê re bê girtin. Pêwiste aştiya di navbera gelan de bê avakirin, hiqûqa navneteweyî esas bê girtin û koordînasyona ewlehiyê pê bê.”
Peyama ji bo dorpêça Hurmuzê
Her çend Xî Jînpîng rasterast navê Amerîkayê neda jî, ev daxuyaniya wî wekî bersivek li hemberî ablukaya deryayî ya Trump ya li Tengava Hurmuz hat nirxandin. Pekîn bi vê gavê dixwaze nîşan bide ku ew piştgiriya aramiya welatên Kendavê dike û li dijî destwerdanên leşkerî yên yekalî ne. Pisporên siyasî dibêjin ku Çîn bi vê plana 4 xalî hewl dide wekî lîstikvanekî aştiyane li herêmê cihê xwe bigire û li hemberî polîtîkayên tund ên Washingtonê, eniyeke dîplomatîk a nû ava bike.
Berya Serokê Çînê Xî Jînpîng Wezîrê Karên Derve yê Çînê Wang Yî û Wezîrê Parastina Çînê Amîral Dong Jun jî daxuyanî dan. Di daxuyaniyê de diyar kirin ku ew dorpêça deryayî ya Amerîka li dijî Îranê daye destpêkirin nasnakin. Hêjayî gotinê ye ku Çîn nêzî ji sedî 80 petrola Îranê dikire, vê dorpêçê wekî gefeke rasterast li ser berjewendiyên xwe yên neteweyî dibîne.
