DYA û Îranê li Pakîstanê di nav seqayek bêbawerî û hevdu sûcdarkirinê de tên cem hev. DYA, Îranê binpêkirina xalên têkildarî Tengava Hurmizê û Îran jî DYA û Îsraîlê bi domandina êrişan û taybetî operasyonên li Libnanê tawanbar dikin.
Agirbesta qels a di navbera Amerîka û Îranê de, rojek beriya hevdîtinên çav li rê yên li Pakistanê rastî xetereyeke mezin hat. Washingtonê Tehran bi binpêkirina peymanên li Tengava Hurmizê tawanbar kir, di heman demê de Îsraîlê jî bi hinceta binpêkirina agirbestê ya ji aliyê Îranê ve êrişî Libnanê kir.
Alozî li Tengava Hurmizê zêde dibe
Li gorî daxuyaniyên rayedarên Amerîkayê, Îranê sozên ku di çarçoveya agirbestê de dabûn pêk neanîne. Tê diyarkirin ku hêzên deryayî yên Îranê li Tengava Hurmizê ya ku ji bo bazirganiya navneteweyî û veguhastina enerjiyê xwedî girîngiyeke stratejîk e, tevgerên xwe yên leşkerî zêde kirine. Washingtonê ev yek wekî binpêkirina eşkere ya şertên agirbestê pênase kir û hişyarî da ku ev nêzîkatiya Tehranê dikare bandoreke neyînî li ser hevdîtinên aştiyê bike.
Êrişên Îsraîlê yên li ser Libnanê didomin
Di demekê de ku çavê cîhanê li hevdîtinên dîplomatîk bû, rageşiyeke din jî li ser xeta Îsraîl û Libnanê rû da. Artêşa Îsraîlê bi hinceta ku komên çekdar ên girêdayî Îranê agirbestê bin pê dikin, gelek êrişên hewayî li ser xaka Libnanê pêk anîn. Îsraîlê îdia kir ku ev êriş bersiva çalakiyên Îranê yên ku ewlekariya herêmê dixin xetereyê ye.
Çavê cîhanê li hevdîtinên Pakistanê ye
Ev rûdanên dawî, tenê rojek beriya civînên girîng ên li Îslamabada paytexta Pakistanê di navbera şandeyên DYA û Îranê de werin lidarxistin, pêk hatin. Tê payîn ku alî li Pakistanê li ser maseyê rûnin da ku agirbesta demkî mayînde bikin û dawî li şerê li herêmê bînin. Lê belê ev aloziyên dawî nîşan didin ku agirbest gelekî bêbingeh e û hevdîtinên li Pakistanê wê di nav atmosfereke tijî rageşî û bêbaweriyê de derbas bibin.
