Îsmaîl Tuzun ê ku li Girtîgeha bi Ewlekariya Bilind a Kirşehîrê tê ragirtin, bi nameyekê binpêkirinên giran ên li girtîgehê ragihandin. Tuzun diyar kir ku ji ber sepandina “lêgerîna hundirê devê girtiyan” nikarin biçin nexweşxaneyê û mafê wan ê tedawiyê bi awayekî sîstematîk tê astengkirin.
Bi ferzkirinên biçûkxistinê tedawiyê asteng dikin
Tuzun di nameya xwe de ku ji parastvana mafên mirovan Nûray Çevîrmen Aykol re şandî de bal kişand ser şert û mercên giran ên hucreyên yekkesî. Tuzun diyar kir ku saetek û nîv tenê derdikevin hewşê û wiha got: “Lêgerîna nava dev li me tê ferzkirin. Ji ber vê sepana biçûkxistinê em nikarin biçin nexweşxaneyê. Nexweşiyên me girantir dibin. Rojê tenê saet û nîvan ava sar didin û ava germ jî mîna heriyê diherike.”
Zext li malbatan û parêzeran jî tê kirin
Di nameyê de Tuzun destnîşan kir ku zext netenê li ser girtiyan, li ser malbat û parêzeran jî heye. Ev agahî di nameyê de cih digirin: “Hevdîtinên bi parêzeran re bi kamerayan têne şopandin û xebatkarên girtîgehê bi awayekî fiîlî guhdar dikin. Di dema serdanan de lêgerînên zêde li ser malbatan têne kirin û zext li wan tê kirin da ku neyên serdanê. Tehliyeyên girtiyan bi awayekî keyfî têne astengkirin.”
‘Nivîsên me tên desteserkirin’
Tuzun got ku her mehê 3-4 caran serdegirtina odeyan pêk tê û wiha dewam kir: “Hemû alav û amûrên me têne belavkirin û nivîsên me têne desteserkirin. Em nikarin pirtûkan ji hevalên xwe re bişînin û sînorê 24 pirtûkan li ser me heye.”
Talûkeya DAIŞ û El-Qaîdeyê
Yek ji tespîtên herî balkêş ên Tuzun jî ew e ku girtiyên siyasî di qatên navberê de têne ragirtin û di qatên jêr û jor ên wan de endamên DAIŞ, El Qaîde û girtiyên edlî têne bicihkirin. Tuzun nivîsand ku daxwaza girtiyan a ji bo “mayîna bi hevrêyên xwe re” heta niha ji aliyê rêveberiya girtîgehê ve hatiye redkirin.
