Li gorî HRANAyê ji ber êrişên Îsraîl-Amerîkayê di 24 saetên borî de li Îranê 15 baregeh bûne hedef û 6 kes hatine kuştin û yek jî birîndar bûye.
Şerê di navbera Îran û Îsraîl-Amerîkayê de di roja xwe ya 38’an de dewam dike. Rêxistina Mafê Mirovan HRANAyê derbarê bûyerên di nava 24 saetên dawî de qewimîne raporek belav kir.
Li gorî raporê di nava 24 saetên borî de, li 11 parêzgehên Rojhilatê Kurdistan û Îranê 168 êriş pêkhatine. Hate gotin ku di êrişan de 15 baregehên leşkerî, baregehên Supayê Pasdaran, navendên Besîc, balafirxaneyên leşkerî, baregehên polîsan, depoyên neftê û binesaziya atomî ya Îranê bûne hedef.
Li gorî heman çavkaniyê di encama van êrişan de 6 welatiyan jiyana xwe ji dest dane, welatiyek jî birîndar bûye.
Di raporê de hate destnîşankirin ku di nava 24 saetên borî de, balafirên şer yên DYA û Îsraîlê, herî zêde êrişî parêzgehên Esfehan, Xuzistan, Tahran, Buşehir, Faris û Hurmizganê kirine.
Gelek baregeh bûne hedef
Li gorî heman raporê, di encama êrişên hewayî de saziyên xizmetguzariyê, cihên niştecihbûna welatiyan bûne hedef, herwiha baregehên pasdaran, baregehên deryayî, pîşesazî, navendên leşkerî, baregehên hêzên hewayî yên li Şîraz, balafirxaneya navnetewî ya li Ehwaz, dibistana amadeyî ya kuran ya li Esfehan, saziya protokimya ya Karwan ya li bendera Mahşehir ya li Xuzistanê, benzînxaneyek li bendera Kung ya li sînorê Hurmizgan û rêveberiya rêyan hatine hedef girtin.
Li gorî HRANAyê ji despêka şerê di navbera Îran û Îsrail-Amerîkayê heya duh, hezar û 616 welatî hatine kuştin. Tê gotin ji vê hejmarê 244 ji wan zarokin ku temenê wan dibin 18 saliyê de ye.
