Kongreya 6an a MXDŞê weke kongreyek guherîn û veguherînê hat lidarxistin bi awayeke serkeftî encam bû. Di hilbijartinê de Azad Hisên û Xoxê Dexîl weke hevserokên meclîsê hatin hilbijartin.
Kongreya 6an a Meclîsa Xweseriya Demokratîk a Şengalê (MXDŞ) ku bi dirûşmeya ‘Yekîtî, Azadî û Çareserî’ li Şengalê hate lidarxistin. Piştî nîqaşên berfireh ên siyasî, civakî û rêxistinî bi nûkirina Hevpeymana Civakî, zelalkirina perspektîfa entegrasyona demokratîk û pêngava rêxistinkirina komînan, bi rojeva hilbijartinê bi encam bû. Kongreyê her wiha plansaziya 2 salan a kar û xebatên Meclîsa Gel a Şengalê zelal kir. Kongreya 6an a MXDŞê, weke kongreyek guherîn û veguherînê bi awayeke serkeftî bi encam bû.
Hevserokên MXDŞê hatin hilbijartin
Di rojeva hilbijartinê de 250 delegeyên kongreyê ji bo hevserokên Meclîsê û cîgirên wan dengên xwe bikaranîn. Di encama dengdanê de Xoxê Dexîl û Azad Hisên weke hevserokên Meclîsa Gel a Şengalê hatin hilbijartin. JI bo cîgirên hevserokan jî Besê Xelef û Hisên Sedo hatin hilbijartin.
‘Heya tifaqê û azadiya civaka Êzidî pêk bên em ê bixebitin’
Hevserokên nû yên Meclîsa Gel a Şengalê, piştî hilbijartinê axaftinek kurt kirin. Hevserokê Meclîsa Gel a Şengalê Azad Hisên, kongrê di şexsê Dijwar Feqîr de diyarî hemû şehîdan kir û got: “Ji roja ku Meclîsa Avaker a Şengalê di 2015an de hate avakirin heya roja me ya îro, em ked û xwêdana herkesekî pîroz dikin ku em dikarin bi keda wan vê kongreyê li dar dixin. Me ji fermanê heya roja me ya îro gelek bedel dan, şehîd dan. Em ê jî li ser vê rêbazê bimeşin heya tifaqê û azadiya civaka Êzidî. Em kongrê li şehîdan, li Serok Apo, li şervanan pîroz dikin.”
‘Em ê xwen û xeyalên şehîdan pêk bîbin’
Hevseroka Meclîsa Gel a Şengalê Xoxê Bedel jî peyameke kurt da û got: “Em jî kongre li hemû şehîdan û Serok Apo pîroz dikin. Bi baweriya ku gelê me daye me, çi erk were pêşiya me em ê bikin da ku em xewn û xeyalên şehîdên xwe pêk bînin.”
Piştî hilbijartinê rêveberiya nû li gel 51 endamên Meclîsa Gel a Şengalê bi hev re sond xwarin û kongre bi dawî bû.
Wê encamname û plansaziya kongreyê sibe were ragihandin.
