15 endamên YJA Starê yên berî 14 salan li Bedlîsê jiyana xwe ji dest dabûn, li ser gorên xwe hatin bibîranîn. Di merasîma bîranînan de behsa têkoşîna jinên şoreşger hat kirin.
15 endamên YJA Starê yên di bin fermandriya Endama Konseya Fermandariya YJA Starê Leyla Altan (Arjîn Garzan) de ku di 24ê Adara 2012an de li Geliyê Şêx Cuma ya Bedlîsê jiyana xwe ji dest dabûn, hatin bibîranîn. Ji bo 15 jinên têkoşer li navçeya Hezoyê ya Êlihê li goristanên gundê Eynhisanê û Gundê Nû merasîma biranînê hat lidarxistin.
Bîranîna ku bi pêşengiya MEBYA-DERê hat pêkanîn, rêveberên rêxistinên DEM Partiyê û DBPê yên Êlih û Hezoyê, endamên TUAY-DERa Êlihê, Dayikên Aştiyê û malbatên cangoriyan beşdar bûn.
‘Di oxira welateke azad de canê xwe dan’
Merasîma yekem li gundê Eynhisanê li goristana Şêx Xelîl pêk hat. Wêneyên cangoriyan li ser goran hat dayîn. Piştî deqeyek rêzgirtinê Hevserokê MEBYA-DERê û her wiha bavê Mizgîn Aratemûr (Hêvî Roj) a ku di heman şerî de jiyana xwe ji dest dabû Şafî Aratemûr axaftinek kir. Aratemûr diyar kir ku her 15 jin di bin fermandariya Arjîn Garzan de berxwedaneke bêhempa li dar xistin û di encamê de jiyana xwe ji dest dan. Aratemûr anî ziman ku van cangoriyan ji bo welatek azad û demokratîk têkoşîn meşandin û di vê oxirê de canê xwe dan. Aratemûr got ku ji bo serkeftinê divê Kurd yekîtiya xwe saz bikin û têkoşîna xwe xurt bikin
‘Bûne agirê Newrozê’
Piştî Aratemûr xwişka Leyla Altan, Nuhat Altan axivî û anî ziman ku Arjîn û hevrêyên xwe, li herêma Xerzanê rastî êrişeke hovane hatin û piştî berxwedaneke çend rojan jiyana xwe ji dest dan. Nuran Altan diyar kir ku 15 jin tam di serdema Newrozê de şerekî mezin pêk anîn û agirê Newrozê bi bedena xwe gur kirin. Altan axaftina xwe bi gotina “Şehîd namirin” bi dawî kir.
Piştî bîranîna li gundê Eynhisanê girse çû ser goristana Endama Konseya Fermandariya YJA Starê Leyla Altan (Arjîn Garzan). Bi heman awayê li vir jî piştî deqeyekî rêzgirtinê li ser têkoşîna jinên jiyana xwe ji dest dane axaftin hatin kirin û soza girêdana bi cangoriyan re anîn ziman.
Derbarê bûyerê de
Li Bedlîsê, li herêma Xerzanê di 22yê Adara 2012an de operasyoneke leşkerî ya berfireh hat destpêkirin. Di encama agahîdayina sîxûran 15 jinên endamên YJA Starê li herêma Geliyê Şêx Ciman rastî êrîşeke giran hatin. Di encama şerê du roj û du şevan de Endama Konseya Fermandariya YJA Starê û yek ji Fermandara Eyaleta Xerzanê Leyla Altan (Arjîn Garzan), gerîlayên YJA Starê Mizgîn Aratemur (Hêvî Roj), Asiye Gunduz (Toprak Canfeda), Meyaser Orbay (Diljin Cilo), Welat Argiş (Bêrîtan Timoq), Şehrîban Argiş (Rûken Aslan), Asuman Mucel (Viyan Dîrok), Yildiz Cimo (Rojda Efrîn), Selma Avci (Berfîn Roza), Ayşe Ahmet (Silav Soran), Perîhan Parlak (Bêrîvan Semsûr), Gulistan Basutçu (Yêrîvan Azadî), Gurbet Altun (Rojevîn Amed), Aklîme Sezer (Jîyanda), Fatma Karayil (Gulbahar Amed) jiyana xwe ji dest dan.
Piştî ev bûyer pêk hat, li ser canê jinan şopên çekên qedexekirî hatibûn tespîtkirin. Hate gotin ku 15 jin digel du roj di bin dorpêçê de man û dihat xwestin teslîm bên girtin jî berxwedana xwe berdewam kirin. Di roja sêyem de, ango di 24ê Adarê de balefirên şer li asîmanên çiyayên Xerzanê xuya kirin û herêmê bombebaran kirin. Her wiha piştî firokên kobra jî herêmê bomberan kirin 15 jinan jiyana xwe ji dest dan.
