Li Enqerê Newroz bi beşdariya gelek beşên civakê yên cuda hate pîrozkirin û banga têkoşîna hevpar hate kirin.
Li Enqereyê “Newroza Azadî û Demokrasiyê” li Anitparkê hatin lidarxistin. Bi hezaran kes, ji ciwan bigire heta mezinan, serê sibê ber bi qadê ve herikîn. Tevî baranê jî, ciwan û jin bi cilên neteweyî û herêmî beşdarî pîrozbahiyê bûn. Herêm bi alên kesk û sor û zer hatin xemilandin. Jin bi kinc û rengên kesk û sor û zer hatin qadê. Kesên amade bi stranên Newrozê re govend gerandin. Girseyê gelek caran diruşmeyên “Bijî Serok Apo”, “Bijî berxwedana Rojava” û “Azadî ji bo Rêber Apo” berz kirin.
Metna hevpar hate xwendin
Pîrozbahî bi kêliyek rêzgirtinê ji bo kesên ku di têkoşîna azadî û demokrasiyê de jiyana xwe ji dest dane, dest pê kir. Nebun Nebahat Çalpan li ser navê Hêzên Ked û Demokrasiyê yên Enqerê metna Kurdî ya daxuyaniya hevbeş û Pinar Guzel jî metna Tirkî xwendin.
Girîngiya pêvajoya aştî û civaka demokratîk
Piştî metnê axaftinên pîrozbahiyê ji aliyê Parlameneterên DEM Partiyê Berdan Ozturk, Seroka Giştî ya Devrîmcî Partiyê Elîf Torun Oneren ve hatin kirin. Di axaftinan de girîngiya Pêvajoya Aştî û Civaka Demokratîk hate bi bîrxistin û ji dewletê hate xwestin ku demildest gavên şênber bavêje. Berdan Ozturk bi taybetî balkişand ser statûya Rêberê Gelê Kurd Abdullah Ocalan û xwest ku şertê xebatê yên azad di zûtirîn demê de bên afirandin.
Bi govend û dîlanê dawî bû
Piştî axaftinan Agirê Newrozê hate pêxistin. Pîrozbahiyê bi stran û govendê berdewam kir. Girseyê bi awayek aramî û bi slogan û çepikan dawî li pîrozbahiyê anî.
