Amed – Rêvebera OHDê Gulbahar Ateş binçavkirin û girtinên bi hinceta Newrozê pêk hatin nirxand û diyar kir ku krîmînalîzekirina çand û nasnameya Kurdî li dijî ruhê aştiyê ye û girtina kesan a bi hinceta cil û bergên neteweyî, binpêkirina mafên mirovan e.
Gelê Kurd îsal pîrozbahiyên Newrozê bi şîara “Newroza Azadî û Yekîtiya Demokratîk” li dar xist û bi hêviyek mezin a çareseriyê pîroz kir. Lê belê tevî ku qad bi milyonan kesan dagirtî bûn û peyamên aştiyê hatin dayîn jî piştî pîrozbahiyan operasyonan binçvkirin û girtinê dest pê kir. Di serdegirtinên malan de gelek kes hatin binçavkirin û girtin. Endama Komeleya Hiqûqnasên Ji Bo Azadiyê (OHD) a Şaxa Amedê parêzer Gulbahar Ateş derbarê binçavkirin û girtina ciwanan de ji Ajansa Welat re axivî û bal kişand ser bandora operasyonên binçavkirin û girtinê ya li ser pêvajoya Aştî û Civaka Demokratîk.
‘Newroz nîşaneya yekîtiya gelê Kurd e’
Gulbahar Ateş bal kişand ser wateya dîrokî ya Newrozê û got: “Newroz bi sedsalan e wek cejneke neteweyî tê pîroz kirin. Ji Kawayê Hesinkar heta îro, ev roj wek nîşaneya yekîtiya Kurdan tê hesibandin. Gelê Kurd her sal bi ruhê azadiyê xwedî li vê rojê derdikeve. Em salekê zêdetir e di nav pêvajoya aştî û civaka demokratîk de ne. Rêzdar Abdullah Ocalan diyar kiribû ku beşdariya komarê divê li ser bingeha nasname, azadiya fikir û çandî be. Lê mixabin piştî Newrozê li her derî operasyon û êriş li ser gel hatin kirin. Dewlet li gorî ruhê aştiyê tevnagere û ev helwest nayê qebûlkirin.”
‘Li Amedê 22 kes hatin girtin’
Gulbahar Ateş têkildarî bîlançoya operasyonan agahî dan û axaftina xwe wiha domand: “Li Amedê nêzî 30 kes hatin binçavkirin û 22 kes jî hatin girtin. Hincetên girtinê ne hiqûqî ne. Wek mînak; posterên rêzdar Abdullah Ocalan kirine hincet. Em vê wek cezakirina civakê dibînin. Ocalan ji aliyê gelan ve wek rêber tê qebûlkirin û nabe ku wêneyên wî wek sûc bê pênasekirin.”
‘Cil û berg beşek ji nasname û çanda gelê Kurd e’
Gulbahar Ateş bal kişand ser astengkirina rengên kesk, sor û zer û cilên neteweyî yên di pîrozbahiyên Newrozê de û wiha got: “Welatiyên bi cilên Kurdî xwe kirinî, bi hinceta ‘cilên leşkerî’ nehiştin bikevin qadê. Cil û berg beşek ji nasname û çanda gelê Kurd e. Hêzên ewlekariyê hewl didin van motîfên çandî krîmînalîze bikin. Ev yek binpêkirina ‘mafê civîn û xwepêşandanên aştiyane’ ye. Divê derbarê van polîsan ku muameleya xerab kirine de lêpirsîn bê destpêkirin.”
‘Divê desthilatdarî gavên erênî biavêje’
Gulbahar Ateş di dawiya axaftina xwe de destnîşan kir ku heta azadiya fikr û çandî pêk neyê, siyaseteke demokratîk ne pêkan e û got: “Gava mirov behsa aştî û demokrasiyê dike, berpirsiyariyeke giran dikeve ser milê mirov. Rêzdar Ocalan gavên dîrokî diavêje; niha dora desthilatê ye ku bi rola xwe rabe û gavên erênî biavêje.”
