Di encama barana zêde de çemê Hecî Hemze rabû û li taxa Cimayê ya Qamişloyê gelek mal di bin avê de man.
Barana zêde li Qamişloyê bû sedema rabûna çemê Hecî Hemze. Di encama rabûna çem de av hilçû û malên li ser rêgeha çem hatine çêkirin, di bin avê de man. Ji ber hilçûna çem malên gelek welatiyan ketin rewşa ku neyên bikaranîn. Şaredariya Gel a Qamişlo û welatiyan hewil dan ku mûdahaleyî hilçûna çem bikin lê ji ber domkirina baranê di kar û xebatan de zehmetî tê kişandin.
Mal li ser rêgeha çem hatine çêkirin
Ji welatiyên taxê Mihemed Salih anî ziman ku avên ji gelek jêderkên wekî Mêrgê, Letîfiyê û Sêgirkê tên tev li çemê Hecî Hemze dibin. Salih got ku ji ber zêdebûna çolteriyê ev çem bi demê re zûha bûye û taxê Cimayê yê Qamişloyê ji ser rêgeha herikîna avê hatine avêkirin. Salih derbirî ku bi hatina baranê jî ev av derdikeve bohaşiya herê jor û her carê mal di bin avê de dimînin.
Hind avahî pêşiya avê digirin
Salîh li ser sedema rabûn avê wiha got: “Lê pirsgirêka herî mezin ew e ku hind dikan li riya avê hatine çêkirin û ev avahî destûr nadin av bi awayek asayî biherike. Berê ev der çem bû, çem hat girtin û sed çêbû. Ji ber wê av li me vegeriya. Şaredarî hat li şûna ku van dikanên di nivîna çem de lê kirine rake, hatiye malên dûrî sedê, dibêje divê hûn vala bikin. Çima qala dikanên ku çem girtiye nakin? Em dixwazin rêgeha avê vebe.”
Ji zarokan çalakî
Zarokên taxê ji bo balê bikişînin ser rewşa xwe, pankartên li ser “Em di bin avê de mane, bi avê de mayîn ne qeder e, sedem sersarî ye” hildane û li ser rêya giştî rawestiyane. Di barana 15-17’ê Adarê de dîsa tax mabû di bin avê de, şêniyên taxê diyar kiribûn ku kompanyayekê di çem de avahî lê kiriye û pêşiya çem hatiye girtin.
Şaredarî: Divê avahî bên rakirin
Şaredariya Gel a Qamişloyê di 18ê Adarê de ji ANHAyê re diyar kir ku wan ji bo lêkirina avahiyê destûr nedaye kompanyayê, wan tenê ji bo sererastkirina dîwarê kampanyayê destûr dabû. Avahiyên kompanyayê muxalîf in û divê avahî bên rakirin.
