Di pêşengtiya MEBYA-DERê de bi boneya Cejna Remezanê li Şirnex, Agiriyê û Stenbolê serdanên goristanan îro jî berdewam kirin.
Komeleya Alîkarî, Piştevanî, Yekitî û Çandê ya Malbatên Xizmên Xwe li Dergûşa Şaristaniyê Winda Kirin (MEBYA-DER), bi boneya Cejna Remezanê li gelek bajaran gorên kesên di têkoşîna azadiyê ya gelê Kurd de jiyana xwe ji dest dane ziyaret kir.
AGIRÎ
Li Agiriyê bi boneya Cejna Remezanê gorên kesên di têkoşîna azadiyê ya gelê Kurd de jiyana xwe ji dest dan ên li Goristanên Fatîh û Yuzuncu Yilê hatin ziyaretkirin. Serdan, bi pêşengtiya MEBYA-DERê hatin kirin. Wekîla DEM Partiyê ya Agiriyê Nejla Demîr, nûnerên partiyên siyasî û malbat tev li serdanê bûn. Di serdanê de dua hatin kirin û cejn hate pîrozkirin.
ŞIRNEX
Li navenda Şirnexê û navçeyên wê Cizîr, Hezex û Silopiyayê jî bi pêşengtiya MEBYA-DERê gorên kesên di têkoşîna azadiyê de jiyana xwe ji dest dane hatin ziyaretkirin. Nûnerên partiyên siyasî, rêxistinên girseyî yên demokratîk û gelek kes tev li bûn. Di serdanê de dua hatin kirin û hat xwestin ku cejn bibe wesîleya aştî û azadiyê.
STENBOL
Di pêşengtiya MEBYA-DERa Stenbolê de li Goristana Gaziyê ya navçeya Sultangaziyê serdana goristanan hat kirin. Rêveberên MEBYA-DERê, Hevserokê DEM Partiyê ya Stenbolê Çinar Altan, malbatên kesên jiyana xwe ji dest dane, malbatên windayan û gelek kes tev li serdanan bûn. Di serdanê de malbat û gel qurnefîlan danîn li ser gorên kesên di têkişîna azadî û demokrasiyê de jiyana xwe ji dest dane.
Hevserokê DEM Partiyê Çinar Altan di serdanê de axaftineke kurt kir û ev tişt gotin: “Em ê herdem li ser rêça şehîdan bin. Em ê xwedî mîrateya wan derkevin. Şehîd ji bo me kaniyekê bêdawî ye.”
Serdan bi danîna qurnefîlan li ser goran, bi dawî bû.
