AVAMED a Şaredariya Bajarê Mezin a Amedê destnîşan kir ku tevî berfa zêde ya îsal bariye, kapasîteya ava paqij nehatiye guhertin û got: “Av heye lê mayînde nîn e. Ne tenê ava şebekeyê lê divê ava sererd û binerd jî were parastin.”
Îsal li gorî salên berê li gelek bajarên Kurdistanê berfeke zêde bariya. Barîna berfê ji bo çavkiyên avê, ava paqij, daristan û çandiniyê jêveneger e. Bi barîna berf û baranan ve parastin û bikaranîna rast a avê jî tê nîqaşkirin.
Rêveberê Gerînendetiya Giştî ya AVAMEDê Mehmet Şerîfoglu, derbarê barîna berfa zêde ya li bajêr axivî.
Mehmet Şerîfoglû destnîşan kir barîna berfê geşedaneke erênî ye û wiha got: “Berfa îsal ya ji salên berê zêdetir bû. Berfa ser hev ji bo bendav û rezervên ava binerd çavkaniyeke girîng e û divê were parastin. Hilberîna ava vexwarinê ne tenê bi barîna baranan re têkildar e. Av heye lê bisînor e.”
‘Parastin divê hevseng û demdirêj be’
Di berdewama axaftina xwe de Mehmet Şerîfoglu destnîşan kir ku kapasîteya Şaredariyê ya parastina ava bisînor e û wiha pê de çû: “Kapasîteya tesîsa me ya parastina avê neguheriye. Barîna berfê kapasîteya parastinê bêsînor nake. Lewma divê parastina avê bi nêzîkatiyeke giştî were destgirtin û feraseta parastina vê divê pêş bikeve. Barîna berfe rehetiyeke demkî çêdike. Divê avên me yên binerd û sererd bi heman nêzîkatiyê werin parastin. Ya baş ew e ku av wek mayînde û hevseng were parastin.”
‘Xizmeta avê ne tenê teknîkî ye jiyanî jî ye’
Mehmet Şerîfoglu got ku AVAMED bi têgihiştina şaredariya civakî tevdigere û derbarê xebatên AVAMEDê ev tişt gotin: “Xizmeta avê ne tenê xebateke teknîkî ya binesaziyê ye. Av rasterast bi tendurustiya gel, domdariya jîngehê û mafê jiyanê yê nifşên pêşerojê re têkildar e. Şaredariya civakî ne tenê hilberîna xizmetê ye; birêvebirina çavkaniyên me yên hevpar bi awayekî adîlane, hevseng û domdar e. Lê parastina avê ne tenê karê saziyan e, wezîfeya hevpar a her kesê ku li vê bajêr dijî ye.”
‘Ne tenê dema krîzê, divê tim were parastin’
Di dawiya axaftina xwe de Mehmet Şerîfoglu diyar kir ku ew veberhêna binesaziyê û kapasîteya teknîkî ya AVAMEDê her dem pêş dixin û wiha pû pê de çû: “Parastina çavkaniyên xwezayî ne tenê wekî berpirsiyariyeke saziyekê dikare bê dîtin.” Mehmet Şerîfoglu bang li welatiyan kir ku avê bi hişmendî û berpirsiyarî bi kar bînin û got: “Av heye lê ne bêsînor e. Her serdemeke barînê ne garantiyeke mayînde ye. Divê av ne dema ku krîz derket, dema ku heye were parastin.”
Hêjayî gotinê ye ku AVKAMED navê xwe kiriye AVAMED.
