Moşekek Îranê li nava erdê gundê Bimbarekiyê ya bi ser navçeya Rezanê ya Amedê ve ket. Hat zanîn ku leşkeran lêkolîn kiriye û moşekê li gel xwe birine.
Şerê di navbera DYA-Îsraîl û Îranê de berdewam dike. Moşekên ku Îran diavêje welatên cîran berdewam dike. Moşekek ku ji aliyê rejîma Îranê ve hatiye avêtin li Amedê li nava erazî ketiye. Hat zanîn ku moşeka Îranê li eraziyê gundê Bimbarekiyê ya bi ser navçeya Rezanê ya Amedê ve ketiye. Ji ber ku li nava erazî ketiye, xesar û ziyan negihîştiye kesî û malên gund. Hat ragihandin ku moşek saet di navbera 14:00an û 15:00an de ketiye.
Piştî gundiyan agahî da cendirmeyan, tîmên cendirmeyan hatin cihê bûyerê û li ser vê moşekê lêkolîn kirin.
Çavkaniyên ji gundê Bimbarekiyê agahî dan ajansa me û gotin ku moşek aîdî Îranê ye. Çavkaniyan diyar kir ku ji dengê ketina moşekê li derdorê belav bûye û li ser vê yekê çûne cihê bûyerê. Çavkaniyan da zanîn ku leşkeran demek dirêj li ser moşekê lêkolîn kiriye û paşê bi kemçepeyê rakirine û li gel li gel xwe birine.
