Şerê Îsraîl, DYA û Îranê ligel êrişên dualî bi pêşketinên nû berdewam dike. Îranê duh li şûna Elî Xemaneyî kurê wî Mocteba Xemaney hilbijart û banga berxwedanê da. Îsraîlê û DYAyê diyar kirin ku qada hewayî ya Îranê kontrol dikin û dê di qonaxa şer a duyemîn de şer gurtir bikin. Di vê navberê de 3 keştiyên Îranê ji ber bomberanê reviyan Hindistanê.
Şerê di navbera Îsraîl, Dewletên Yekbûyî yên Amerîkayê û Îranê de ketiye roja xwe ya 10an. Duh û îro jî bombebarana balefiran û avêtina moşekan li Îran û hin herêmên Rojhilata Navîn berdewam kir.
Her wiha wekî lingek şerê li Îranê, li Libnanê jî bombebaran û pevçûn diqewimin. Hate ragihandin ku Neteweyên Yekbûyî dê li ser rewşa Libnanê civîneke awarte pêk bîne. Pêşketinên ji duh heta niha nîşan didin ku çarçoveya şer di qonaxa duyemîn de berfireh dibe.
Îsraîlê li dijî Îran û Hizbûllahê êrişên nû pêk anîn
Artêşa Îsraîlê duh bi daxuyaniyekê ragihand ku hêzên wan ên hewayî êrîşên nû li dijî hind tesîsên avêtina peykên Îranê pêk anîne. Di daxuyaniyê de hat gotin ku ev tesîs dikarin bû ku di pêşxistina bernameya nûkleerî ya Îranê de werin bikaranîn. Li gorî heman daxuyaniyê, hêzên hewayî yên Îsraîlê îro serê sibehê jî êrîşî binesaziyên Hizbûllahê yên li Beyrûtê û hin hedefên cuda yên li Îranê kirine.
‘Li Otêla Ramada 5 berpirsên Hizbûllahê hatin kuştin’
Hat diyarkirin ku ev êrîş piştî avêtina pêlên moşekan ên Îranê pêk hatiye. Her wiha artêşa Îsraîlê duh ragihand ku di êrîşeke li ser Otela Ramada ya li Beyrûtê de pênc berpirsên payebilind yên ku di navbera Hizbûllah û Hêzên Qudsê yên girêdayî Îranê de têkilî danîn, hatine kuştin.
Hedefên nû yên artêşa Îranê hedef hatin girtin
Li gorî agahiyên hatine belavkirin, di êrîşên îro yên li ser Îranê de jî gelek navendên moşekavêjan, baregehên Pastarên Şoreşa Îslamî, baregehên hêzên ewlekariya navxweyî li Îsfahanê û hin navendên polis û milîsên Basîc bûne hedef bomberana Îsraîlê.
Keştiyên Îranê reviyan Hindistanê
Li gorî agahiyên ajansa Reutersê, Wezîrê Karên Derve yê Hindistanê Subrahmanyam Jaishankar îro di daxuyaniyekê de got ku Îranê ji bo sê keştiyên xwe daxwaza destûrê kiribû ku li benderên Hindistanê lengerê biavêjin. Jaishankar diyar kir ku ev destûr hate dayîn û keştiyên Îranê niha li hin benderên Hindistanê lenger berdane avê.
Li Neteweyên Yekbûyî civîneke awarte ji bo Libnanê
Encûmena Ewlekariyê ya Neteweyên Yekbûyî ragihand ku dê vê hefteyê li ser rewşa li Libnanê civîneke awarte were lidarxistin. Hate diyarkirin ku ev civîn li ser daxwaza Fransayê û bi piştgiriya hin welatên endamên Yekîtiya Ewropayê tê lidarxistin.
‘Bila Libnan Hizbûllahê bêçek bike’
Balyozê Îsraîlê yê li Neteweyên Yekbûyî Danny Danon jî di daxuyaniyekê de got ku civînên din ên Encûmena Ewlekariyê an jî serdanên Sekreterê Giştî yê NYyê dê rastiya li ser erdê neguherînin. Danon xwest ku hikûmeta Libnanê Hizbûllah bêçek bike û Biryarnameya 1701an a Encûmena Ewlekariyê bi cih bîne û wiha got: “Eger Lubnan vê yekê neke, Îsraîl dê ji bo parastina welatiyên xwe Hizbûllah ji holê rake.”
Pezeşkiyan ji Azerbaycanê lêborîn xwest
Serokkomarê Îranê Mesud Pezeşkiyan duh îdiayên ku dronan ji Îranê ve êrîş li herêma otonom ya Naxçevanê ya Azerbaycanê kirine red kir. Pezeşkiyan got ku dê li ser vê mijarê lêkolîneke fermî were kirin. Ev daxuyanî di demeke ku aloziya navbera Îran û Azerbaycanê de zêde bûye hat dayîn.
Mojteba Xameneyî bû Rêberê Bilind ê nû yê Îranê
Meclîsa Pisporan ya Îranê ragihand ku Mocteba Xameneyî wekî Rêberê Bilind ê nû yê welêt hat hilbijartin. Hat ragihandin ku bavê wî Elî Xameneyî di 28ê Sibatê de di êrîşeke asmanî ya Amerîka û Îsraîlê de hatibû kuştin. Mocteba Huseynî Xameneyî di 8ê Îlona 1969an de li Meşhedê ji dayik bûye. Ew kurê duyemîn ê Rêberê Bilind ê berê Elî Xameneyî ye. Piştî damezrandina Komara Îslamî ya Îranê di sala 1979an de, ew di hawîrdorek olî û siyasî de mezin bû. Perwerdehiya xwe ya destpêkê li Tehranê girt û di sala 1999an de çû Qumê da ku li medreseyê xwendina olî bidomîne. Li wir zanistên Îslamî xwend.
Di ciwaniya xwe de jî wekî endamê hêzên Besîc beşdarî Şerê Îran–Îraqê bû.
