Gulten Kışanak a ku beşdarî bernameya li Îzmîrê bû diyar kir ku Elewî her dem û di her kêliyê de, li cem heq, heqîqet û mezlûman sekinînê û ev wekî felsefeya jiyanê qebûl kirine.
Bi hevkariya Kongreya Demokratîk a Gelan, Komeleyên Elewiyên Demokratîk (DAD) û Komeleya Piştevaniyê ya Kanîreşê li navçeya Bayrakliyê ya Îzmîrê bernameya “Em bi çira, beyt û pariyên xwe pêşwaziya 8ê Adarê dikin” hat lidarxistin. Bername bi beşdariya Aktîvîsta Tevgera Jinên Azad (TJA) Gultan Kışanakê pêk hat. Di civînê de pankarta “Em di rêya jinên ku têkoşîna heq û heqîqetê didin dimeşin” hat vekirin û stran hatin gotin.
‘Rêya me rêya heq û heqîqetê ye’
Di bernameyê de Gultan Kişanak bal kişand ser girîngiya van hevdîtinan û destnîşan kir ku ji bo pêşerojeke azad divê em mil bi mil bin û got “Ev baweriya me, felsefeya me ya jiyanê û hestên me yên her kêliyê ne. Helbet rîtuel û îbadetên me hene, lê çavkaniya bingehîn a vê rêyê lêgerîna edalet û heqîqetê ye. Heke em dixwazin vê rêyê bimeşînin, divê em li dijî zaliman her tim li cem mezlûman bin. Rêya me ne tiştekî ku li derekê dest pê dike û diqede ye; ev pêvajoyek û rêyek e.”
Banga 8ê Adarê
Gultan Kişanak bi bîr xist ku 8ê Adarê roja berxwedan, wekhevî û lêgerîna mafan e û got: “Em li vir in da ku têkoşîna wekheviya jin û mêran, wekheviya nasname û gelên cuda her tim zindî bihêlin û vê yekê bi rêxistin bikin.”
‘Divê Îrana rejîma sêdaran biguhere’
Gultan Kişanak herî dawî bal kişand ser rewşa Îranê û rejîma îdamê û destnîşan kir ku Îran, mirinê li Kurdan, li alîgirên azadiyê û li her kesî ferz dike û got: “Em êrişên emperyalîst şermezar dikin, lê di heman demê de em dixwazin ev rejîma melayan ya ku gelan qetil dike jî biguhere.“
