Şerê di navbera Amerîka-Îsraîl û Îranê di roja şeşemîn de ye. Li herêmê li pey hev geşedanên nû diqewimin. Li ser Tehranê pêleke êrişên nû hate destpêkirin, li welatên Kendavê û Lubnanê jî teqînên mezin rû dan.
Piştî ku Îsraîlê ragihand ku wan li dijî Tehranê dest bi êrişên nû kiriye, Îranê peyamên tund dan Amerîkayê. Şerê heyî bandor li Lubnanê jî kir. Li Kendavê jî di tankereke petrole de teqînek rû da. Her ku şer dirêj dibe li qada şer êriş û bîlançoya şer jî zêde dibin.
Îsraîl: Me êrişên li ser binesaziya rejima Îranê zêde kir
Artêşa Îsraîlê ragihandin ku wan li ser binesaziya rejîma Îranê ya Tehranê dest bi pêleke nû ya êrişê kiriye Medya heremî ya Îranê diyar kir ku îro li Tehran û derdora rojavayê bajêr gelek teqîn çêbûn. Ajansa Nûçeyan a Farsê ragihand ku li rojavayê Tehranê teqînek çêbû. Rojnameyên Şarq û Îranê jî ragihandin ku li bajarê Karajê yê li rojavayê Tehranê teqînek qewimî.
Îranê: Hun ê poşman bin
Wezîrê Karên Derve yê Îranê Abbas Arakçî piştî êrişa li ser keştiya şer a Îranê ya li nêzî Srî Lankayê, nerazîbûneke tund nîşanî Amerîkayê da. Arakçî li ser hesabê Xê daxuyanî da û diyar kir ku Amerîkayê li qada navneteweyî ya deryayî li firkateyneke Îranê xist û wiha got: “Amerîka ji ber vê kiryara xwe wê bi rengekî giran poşman bibe.” Li gorî wezîrê Îranî, keştî li ser vexwendina hêzên deryayî yên Hindistanê li herêmê bû û nêzî 130 deryavan tê de bûn.
Li qada deryayî ya Kûwêtên teqîn
Hate ragihandin ku li peravên Kûweytê di tankereke petrolê de teqîneke mezin çêbû. Ajansa Ewlekariyê ya Deryayê ya Îngilistanê (UKTMO) diyar kir ku petrol rijiya nava deryayê. Piştî vê agahiyê, Muxafizên Şoreşê diyar kirin ku wan li Kendavê li tankereke petrolê ya Amerîkayê xistine.
Li Qatar û Bahreynê teqînên mezin
Îro li paytexta Qatar Dohayê û li paytexta Bahreyn Manamayê jî teqînan çêbûn. Li gorî medya Amerîkayê, balafirên şer ên Îranê nîvê şevê hewl dan êrişî baregeha Amerîkayê ya Al-Udeid ya li Qatarê bikin. Lê hêzên hewayî yên Qatarê balafir xistin. Li gorî CNNê ev operasyon yekemîn operasyona hêzên hewayî yên Qatarê ye.
Îran: Me tu moşek ber bi Tirkeyê ve neavêtiye
Hêzên Çekdar ên Îranê derbarê îdîayên ku dibêjin ‘Îran ber bi Tirkiyeyê ve moşek avêtiye’ red kir. Di daxuyaniyê de hate ragihandin ku ew ji serweriya Tirkiyeyê re rêzdar in.
Îran: Em ê pergala nukleerî ya Îsraîlê bidin
Reutersê jî bal kişand ser daxuyaniyekê ku di ajansa nûçeyan a nîv fermî Îranê ISNAyê de hatiye weşandin û diyar kir ku rayedarekî leşkerî yê Îranî diyar kiriye ku heke Amerîka hewl bide ku rejîma Komara Îslamî hilweşîne, wê li navenda nukleerê ya Dînoma ya li Çola Negevê ya Îsraîlê bixin.
Kanada û Awûstralya amadekariya tevlîbûna şer dikin
Serokwezîrê Kanadayê Mark Carney anî ziman ku heke şerê li Rojhilata Navîn mezin bibe, dibe ku ew jî bi rengekî leşkerî tevlî bibin. Serokwezîra Îtalyayê Georgia Meloni jî ji radyoya RTL 102.5 re axivî û di axftinê de aşkere kir dema ku Îngilistan, Fransa û Elmanya alîkariyê ji welatên Kendavê re bişînin ew ê jî piştgiriya parastina hewayî bidin heremê.
Rayedarê Hamasê hat kuştin
Artêşa Îsraîlê bang li şêniyên li başûrê Lubnanê kir ku xwe vekişînin bakurê Çemê Litanî. Berdevk Artêşê diyar kir ku hişyarî ji bo bajarên Sûr (Tyre) û Bînt Cbeîl jî derbasdar e. Ajansa Nûçeyan a Fermî ya Lubnanê ANI jî diyar kir ku li kampa penaberan a Beddawî di encama êrişa balafira bêmirov a Îsraîlê de rayedarê Hamasê Wassim Atallah al-Ali û hevjîna wî hatine kuştin.
