Hevseroka Şaxa Egîtîm-Senê ya Wanê Fûnda Demîr Bozkûrt bertek nîşanî êrişa li Stenbolê ya li dijî mamosteyan pêk hatî da û diyar kir ku berpirsyarê vê êrişê Wezareta Perwerdehiya Neteweyî ye.
Şaxa Egîtîm-Senê ya Wanê têkildarî êrişa li Stenbolê ya di dibistanekê de li hember mamosteyan pêk hatî, li Wanê meşek li dar xist û daxuyaniyek da. Edamên Egîtîm Senê li ber Şekerbankê ya li navçeya Rêya Armûşê kom bûn û heta Qada Bajêr bi pankarta, “Em tundiya li ser qada perwerdeyê qebûl nakin” û bi dirûşmên weke “Dijminê mamosteyan Yusuf Tekîn îstîfa” meşiyan. Di meşê de dowîzên weke “Em polîtîkayên mamoste û xwendekaran diparêzin, dixwazin”, “Ji tuniya li hember kedkarên perwerdeyê re bibêje na” hatin rakirin. Hevserok û rêveberên saziyên sivîl û gelek mamoste tev li meş û daxuyaniyê bûn.
Polîtîkayên Wezareta Perwerdeyê hatin rexnekirin
Hevseroka Şaxa Egîtîm-Senê ya Wanê Fûnda Demîr Bozkûrt metna daxuyaniyê xwend û da zanîn ku bûyerên tundûtûjiyê yên ku li dibistanan zêde dibin, demeke dirêj e her ku diçe dibin gefeke cidî. Bozkûrt bal kişand ser rola Wezareta Perwerdehiya Neteweyî û wiha got: “Wezareta Perwerdehiyê ku hişyariyên me li ber çavan negirtine û polîtîkayên mayînde û pêşîlêgir nexistine meriyetê, berpirsê yekem ê vê bûyerê ye. Ji ber ku gavên berbiçav û mayînde nehatine avêtin, atmosfera tundûtûjiyê kûrtir bûye. Pêkanîna êrîşekê bi amûrên birîndarker di hundirê dibistanê de, bi eşkereyî nîşan dide ku mekanîzmayên ewlehiyê kêm û qels in. Divê mekanîzmayên ku pêşiyê li ber tundûtûjiya li dibistanan nagirin, bi rengekî cidî di ber çavan re bên derbaskirin. Wekî kedkarên perwerdehiyê, em daxwaza hawirdoreke xebatê ya ewle dikin. Ev daxwaz ne îmtiyazek e, mafê herî bingehîn e. Di dibistaneke ne ewle de, pêvajoyeke perwerdehiyê ya saxlem nayê meşandin.”
Daxuyanî bi çepikan bi dawî bû.
