Xelkê Tilezêr a Şengalê li hemberî biryara komkirina çekan ev tiştanî ziman: “Ji bo aramiya herêmê biryara komkirina çekan betal bike. Pêdiviya Şengalê bi aramiyê heye.”
Li hemberî hewldanên artêşa Iraqê yên ji bo bêçekkirina civaka Êzidî û taybet hêzên wê yên parastinê, civaka Êzidî bi fikar e. Civaka Êzidî van hewldanan weke siyaseteke taybet a li ser Şengalê û girêdayî siyaseta dewleta tirk a ku li ser Iraqê ferz dike, dinirxîne. Heya niha di serî de hêzên eşayîrî yên Şengalê, hemû beşên civakê li hemberî vê siyasetê helwest nîşan dan û diyar kirin nabe ku civaka Êzidî û Şengal di nav evçend gef û metirsiyên de bê parastin bêne hiştin.
Îro jî civaka Êzidî li nahiya Tilezêr a Şengalê bi daxuyaniyekî bang li hikûmeta Iraqê kir da ku dest ji wan pêkanînên li ser Şengalê û hewldanên ku parastina civaka Êzidî dixe xeteriyê berde, ji bo ewlehî û aramiya herêmê, biryara komkirina çekan betal bike.
Daxuyanî li navenda Tilezêr li ber bîrdariya Şehîdên 14’ê Tîrmehê hate dayîn. Daxuyanî li ser navê xelkê Tilezêr ji aliyê mamoste Diyab Ziyad ve hate xwendin.
‘Hewldanên artêşê di nav civakê de fikaran çêdike’
Di daxuyaniyê de hate destnîşankirin ku di rojên dawî de di nav xelkê Şengalê de rewşek ku fikaran ava dike derketiye holê û wiha hate gotin: ‘’Artêşa Iraqê û hêzên dijeteror bi armanca desteserkirina çekên wan ên ferdî û sivik, li gund û komelgehên Êzidiyan ên li Şengalê bi ser malên welatiyan de girtin.’’
‘Pêdiviya Şengalê bi aramiyê heye, ne bi zextan’
Di daxuyaniyê de hate destnîşankirin ku ev tedbîr û pêkanîn bi zextên dewleta tirk li ser Şengalê û civaka Êzidî tê meşandin û wiha berdewam kir: ‘’Em vê rewşê wekî kiryarek ne guncaw dibînin, ji ber ku diviyabû rewş bi awayekî berçav û bi berpirsyarî were rêvebirin.
Civaka Êzîdî, ku rastî neheqiyê hatiye û hîn jî ji bandorên qirkirinê êş dikişîne, hewcedarî ewlehî û piştgiriyê ye, ne zext û fikarên nû. Em bawer dikin ku ev tedbîr xizmeta aramiya herêma Şengalê nake û dibe ku di demekê de ku rewşa herêmê û civaka Êzîdî nikarin bêtir aloziyê tehemûl bikin, fikarên niştecihan kûrtir bike.’’
‘Biryarên taybet divê li ser Şengalê neyên ferzkirin’
Di daxuyaniyê de her wiha bang li hikûmeta Iraqê hate kirin ku di girtina biryarên ewlehiyê de, divê bê îstîsna û bêyî ku komeke taybetî bike hedef li ser hemû parêzgeh û gelê Iraqê bicîh bîne; ne ku tenê li ser civaka Êzîdî ya li Şingalê were ferzkirin.
‘Divê biryara komkirina çekan were betalkirin’
Di dawiya daxuyaniyê de her wiha bang li hikûmeta Iraqê û Serokwezîr Sûdanî hate kirin ku destwerdanê li rewşa heyî bike, li kêleka civaka Êzîdî bisekine, da ku ewlehî û aramiyê misoger bike û biryara komkirina çekan betal bike.’’
