Stenbol – Birayê Ridvan Karakoç ê ku di binçav de hatibû windakirin Hasan Karakoç diyar kir ku kesên ku mafên gelê xwe diparastin û ji bo gelê Kurd têdikoşiyan hatin windakirin û got: “Dewlet û hêzên ku di nava dewletê de bûn, mirovên me winda kirin. Divê ew kes bên dîtin û darizandin. 31 sal in em li Qada Galatasarayê ne, hezar sal jî derbas bibe em ê li vir bin.”
Beriya 31 sal di roja 15ê Sibata 1995an de Ridvan Karakoç ji aliyê polisan ve hat binçavkirin. Malbata Karakoç ji bo Ridvan Karakoç serî li her derî dan lê tu agahî negirtin. Piştî 110 rojan cenazaya Ridvan Karakoç li Goristana Bêkesan ya Altinşehîrê hat dîtin. Di ser windakirin û kuştina Ridvan Karakoç re 31 sal derbas bûn lê hê jî tu berpirsiyar anjî kujer nehatine dîtin. Birayê Ridvan Karakoç, Hasan Karakoç têkildarî salvegera windakirina birayê xwe û têkoşîna ji bo edaletê ji Ajansa Welat re axivî.
Ji wê rojê ve tu agahî jê negirtine
Hasan Karakoç bi bîr xist ku di sala 1994an de şevekî saet di yekê de polîsan avêt ser mala van û got: “Polîsan li Ridvan pirsî lê Ridvan ne li malê bû. Polîsan ji me re got, ‘Hûn Ridvan ji me re neynin, em Ridvan li ku bibînin em ê wî bikujin’. Di nava malê de îşkence li me kirin û ez hatim binçavkirin. Min birin Şûbeya Gayrettepeyê, em 37 kes li wir bûn. 14 rojan îşkencê li me kirin. Paşê ez hatim berdan. Ridvan nêzî salakî li malên xizmên me xwe veşart. Bi vî awayî nêzî salakî derbas bû. Têkiliya me bi hev re hebû. Ridvan roja 15ê Sibatê li me geriya û paşê tu agahî me jê negirt. Me fêm kir ku tiştek hatiye serê wî. Li nexweşxane, qerekol û Tiba Edlî em li Ridvan geriyan. Lê me derheqê Ridvan de tu agahî bi dest nexist.”
‘31 sal in em li kujerên Ridvan Karakoç dipirsin’
Hasan Karakoç anî ziman ku malbata Hasan Ocak ê ku ew jî di sala 1995an de hatibû binçavkirin û windakirin kurê xwe digeriyan û wiha axivî: “Dema ku malbata Hasan Ocak li kurê xwe digeriya di nava arşîva pirtûka Tiba Edlî de wêneyê Ridvan Karakoç ditîbûn. Lê ji wan re gotibûn ku ew kes Kenan Bîlgîn e. Hevalên Kenan Bîlgîn jî paşê çûbûn Tiba Edlî. Lê hat fêmkirin ku ew kes ne Kenan Bîlgîn e. Leşker hatibûn gundê me û ji malbata me re gotibûn ‘Ridvan di binçav de hatiye kuştin û li goristana bêkesan a Altinşehîrê hatiye veşartin’. Malbata me serî li Tiba Edlî da, paşê jî me cenazeya Ridvan dît. Me Ridvan ji wir girt û li gorî edetên xwe li Taxa Gaziyê veşart. Bi hezaran kes tev li merasîma Ridvan bûn û xwedî lê derketin. Paşê em bi malbatên ku wekî me re li vir dest bi çalakiyê kir. Îro 31 sal in em li kujerên Ridvan Karakoç dipirsin.”
‘Heta niha li tu kesî doz nehatiye vekirin’
Hasan Karakoç da zanîn ku ev 31 sal e kujerên Ridvan Karakoç nehatine dîtin û wiha axivî: “2-3 mehan carekî em diçin Dadgeriya Beykozê. Em pirsa birayê xwe dikin lê em dibînin ku di dosyayê de tu pêşketin tune ye. Bi ser bûyerê re 31 sal derbas bûne lê heta niha li tu kesî doz nehatiye vekirin. Siyasetmedar û ciwanên Kurd di binçav de hatin windakirin. Kesên ku mafê gelê xwe parastin û di rewşa gelê Kurd de têdikoşiyan hatin windakirin. Dewlet û hêzên ku di nava dewletê wan winda kir. Dewlet bi xwe ew kesan winda kir, ji bona wê jî ji bo berpirsiyar dernekeve holê tu doz venekir. Kujer jî di nava gel de digerin.”
‘Me vê têkoşînê ji dayik û bavê xwe girt û me dewrî zarokên xwe kir’
Hasan Karakoç bi bîr xist ku ew 31 sal in li Qada Galatasarayê ne û axaftina xwe wiha bi dawî kir: “Kesên ku dema me dest bi çalakiyê kirine hatine dinê îro 31 salî ne û zarokên wan heye. Bi hezaran kes di vê berxwedanê de jiyana xwe ji dest dan. Axê wan di destê dewleta Tirkiyeyê de ye. Îro pêvajo heye, divê hin tişt ji me jî bên pirsîn. Divê aqûbeta xizmên me yên ku hatine windakirin bên eşkerekirin. Kî îşkence li wan kir û kuşt divê bên eşkerekirin. Divê ew kes bên dîtin û darizandin. 31 sal in em li vir in, hezar sal jî derbas bibe jî em ê li vir bin. Me vê têkoşînê ji dayik û bavê xwe girt û me dewrî zarokên xwe kir.”
