Serokê Amerîkayê Trump duh di ser hesabê xwe de aşkera kir ku Amerîka û Îran danûstandinên ‘baş’ pêk anîn û Îran dixwaze şer bidawî bibe. Lê Tehranê êrîşên nû yên moşekî li dijî Îsraîlê pêk anîn û Îsraîlê daxuyand ku dê êrişên wan berdewam bikin.
Serokê Amerîkayê Donald Trump di hefteya çaremîn ya şerê bi Îranê re de diyar kir ku 5 roj êrişên li dijî binesazî û enerjiyê ya Îranê rawestandine û wiha got: di hevditinan de ihtîmala geşbîniyekê heye. Dibe ku di nêzîk de bikaribin operasyonên xwe bi dawî bikin.” Serokwezîrê Îsraîlê Binyamîn Netanyahû jî daxuyaniyek li ser hesaba xwe ya dijîtalê belav kir û daxuyand ku li ser mijara rawestandina êrişan bi Trump re hevdîtinek kirine. Netanyahû anî ziman ku di encama lêdanên wan de pişta Îranê şikandine û Trump difikire di vê rewşê de encamek erênî bigire.
Trump dixwaze nakokî biafirîne
Di daxuyaniya Netanyahû de fikra 5 rojan rawestandina êrişan wekî fikir û daxwaza Trump hate pênasekirin. Netanyahû nêrîna Îsraîlê ya di vî warî de jî bi zelalî venegot. Ev yek wekî, “Trump dixwaze hewildanekê pêk bîne lê Îsraîl alîgirê vê yekê nebe jî naxwaze bi Trump re bê hember hev” hate nirxandin. Daxuyaniyên Trump ên bi nakok bû sedema nîqaşên nû. Trump bi zelalî ne got ka bi kî re hevdîtinan pêk tîne. Bi gotina, “Em bi kesekê re hevdîtinê pêk tînin. Ev ne Mûctaba Xamaney e. Ayetûllahek mezin e na jî yê lû du wan tê ye” serî tev li hev kirin. Ev yek jî wekî ku Trump dixwaze di nav rayedarên Îranê de nakokiyê çê bike hate nirxandin.
Îranê hevdîtin red kirin
Rayedarên Îranê li ser hev daxuyanî dan û hevdîtinên bi DYAyê re red kirin. Her wiha Serokwezîrê Îranê Mesûd Pezeşkiyan jî bi daxuyaniyekê ragihand ku Trump dixwaze dem bi dest bixe û peyama îstîkrarê bide piyaseyên navneteweyî. Pezeşkiyan daxuyaniyên Trump wekî manîpûlasyonê nirxandin. Lê di heman demê de çavkaniyên pêbawer ên navneteweyî ragihandin ku hevdîtnek li Pakistanê pêk bê, hatine plankirin.
Netenyahû: Min û Trump ji bo peymaneke pêkan ya bi Îranê re gotubêj kir
Serokwezîrê Îsraîlê Benjamin Netanyahu got ku wî di dema ku êrîşên Îsraîlê yên li ser Îran û Libnanê berdewam dikirin de li ser peymaneke muhtemel ya bi Îranê re bi Serokê Amerîkayê Donald Trump re gotûbêj kiriye. Netanyahu diyar kir ku wî îro di saetên sibê de bi hevalê xwe Trump re axiviye û wiha got: “Trump ji bo pêkanîna peymaneke baş derfetek dibîne ku dest bi hevdîtinên wisa dike.” Netanyahu destnîşan dike ku Îsraîlê hêza moşekî û nukleerî yên Îranê pûç kiriye û du zanyarên nukleerê jî kuştine.
Axîos: Berpirsên Amerîka û Îranê dê li Pakistanê bicivin
Trump diyar kir ku rêveberiya wî bi “berpirsekî payebilind” yê Îranê re di têkiliyê de ye û hişyarî da ku eger danûstandin di nav pênc rojan de bi ser nekevin, dê bi her awayî bombebarankirina binesazî û çavkaniyên enerjiyê yên Îranê bidomînin. Malpera Axios a Amerîkayê li ser navê perpisekî Îsraîlî îdia dike ku muxatabê hevdîtinê Serokê Meclîsa Îranê Mihemed Beger Elqelîbaf e û dê berpirsên Amerîkayê li Pakistanê bi şandeyeke Îranî re bicivin.
Di êrişa Amerîka-Îsraîlê de 6 kes hatin kuştin û 9 kes jî birîndar bûn
Li gorî Ajansa Nûçeyan a Xwendekarên Îranê (ÎSNA) ragihand ku di êrîşeke hevbeş ya Amerîka-Îsraîlê ya li Parêzgeha Azerbêcana Rojhilat ya îro de herî kêm şeş kes hatine kuştin û neh kes jî birîndar bûne. Ajans diyar dike ku ev êrîş li dijî herêma Şehîd Mofateh ya li bakur-rojavayê Îranê ya li nêzî sînorê Ermenistan, Azerbêcan û Tirkiyeyê pêk hatiye.
Îranê Amerîka bi xapandinê tawanbar kir
Li gorî Ajansa Nûçeyan a Farsê parlamenterekî payebilind yê Îranî bal kişandiye ser bûyerên berê yên hevdîtinên bi Amerîkayê re ku Amerîka di wê serdemê de dest bi operasyonên leşkerî kiriye.
Îsmaîl Kowsarî, endamê komîteya ewlehiya neteweyî ya meclîsê û generalê leşkerî got ku baweriya wan bi siyaseta Washingtonê nayê û gotina xwe wiha bidawî kir: “Ev ne cara yekem e ku ew li ser danûstandinan derewan dikin, Trump, Netanyahu ji malzaroka xwe ve derewkerin.” Kowsarî vedibêji ku mabesta Amerîka û Îsraîlê ev e ku nakokiyê di nava rêveberiya Îranê de çêkin û bêbaweriya ji bo rêvebiriya Îranê zêde bikin.
Îranê êrişa moşekî pêk anî 6 Îsraîlî birîndar bûn
Her çiqas înkarkirina hevdîtnan hebe jî baweriya giştî ew e ku di navbera Îran û DYAyê de hevdîtin jî hene. Lê televîzyona dewletê ya Îranê îro di saetên serê sibê de aşkera kir ku hêzên wan êrişeke nû ya bi moşekan li dijî Îsraîlê pêk anî. Li gorî raporeke The Times of Israel di êrîşa hewayî ya Îranê de li ser Tel Avîvê herî kêm şeş kes birîndar bûn. Di vê navberê de, Kanaala 12 ya Îrsaîlê ragihand ku polîsan diyar kiriye ku teqemeniyeke bi qasî 100 kîlo li navenda Tel Avîvê ketiye û zirareke mezin daye avahî û wesayîtan.
