YRDê ji ber wefata rojnameger û nivîskar Huseyîn Aykol peyama bîranînê weşand û got: “Ji bo avakirin û pêşvebirina kevneşopiya Çapemeniya Azad bi rengekî fedaî têkoşiya.”
Koordînasyona Giştî ya Yekîtiya Ragihandina Demokratîk (YRD) ji bo rojnameger-nivîskar Huseyîn Aykol (70) peyama sersaxiyê ango bîranînê weşand. Huseyîn Aykol şeva sersalê li nexweşxaneya ku lê dihat dermankirin jiyana xwe ji dest dabû. Huseyîn Aykol yek ji wan rojnamegeran ku mamosteyê Çapemeniya Azad bû.
Peyama YRDê bi vî rengî ye:
“Çinara me ya 36 salan, hişê çapemeniya azad, xoceyê me yê dilovan û hevrêyê me yê gelekî hêja Huseyîn Aykol bi fîzîkî ji nava me koç kir ku vê yekê em gelekî êşand. Em bi sebreke mezin li benda wê yekê bûn ku mamosteyê me rehet bibe, lê mixabin şehîd bû. Bi vê wesîleyê bila serê malbata wî, hezkiriyên wî, gelên me û civata çapemeniya azad sax be.
Hevrêyê me Huseyîn Aykol di demekê de ku êrişên qirkirinê yên li ser gelê Kurd zêde bûn weke şoreşgerekî Tirkiyeyî û rojnamevanekî rasteqîn cihê xwe li gel gelê Kurd û têkoşîna azadiyê ya Kurd girt. Dît ku demokratîkbûna Tirkiyeyê tenê bi azadiya gelê Kurd dibe, lewma beşdarî nava têkoşîna azadiyê bû û bi sekna xwe ya têkoşer nirxeke mezin afirand.
Mamosteyê me Huseyîn Aykol ji 51 salên rojnamevantiya xwe 36 sal da avabûn û pêşvebirina kevneşopiya çapemeniya azad. Heta ku pirsgirêkên tenduristiyê lê der bûn ku bûn sedema şehadeta wî, bê navber ked da, hewl da û bi rengekî fedaî têkoşiya. Ji me xebatkarên çapemeniya azad re mamostetî kir, em perwerde kir û gihand. Ji gel, jin, keedkarên Kurd û bindestan hemûyan re hevrêtî kir. Di vê oxirê de bû têkoşerekî xurt. Bû dengê bi hezaran girtiyên li zindanê. Raya giştî ya demokratîk bi rêya nivîsên wî heqîqet hîn bû, xwe perwerde û zane kir.
Em baş pê zanin û hîs dikin ku hevrê Huseyîn Aykol tenê bi fîzîkî ji nava me koç kiriye. Di her kêliya ku em nefesê digirin û di her karî de wê bi me re be.
Weke şagirtên wî em ê tiştên ku ji mamosteyê xwe yê hêja hîn bûne, weke wî bêyî rawestînê, bi karekî hîn zêde bixin pratîkê, em ê pênûsa mamosteyê xwe li erdê nehêlin û armanca wî ya Kurdistana Azad û Tirkiyeya Demokratîk teqez pêk bînin.
Em careke din sersaxiyê ji malbata hêja, hezkiriyên mamosteyê xwe, gelên xwe û dostên xwe re dixwazin û di şexsê mamoste Huseyîn Aykol de soza serketinê ku me dane şehîdên xwe yên şoreşê hemûyan careke din dubare dikin.”
