YPJê jina Êzidî ya binavê Reham Hecî Hemê ya di Fermana 74an de ji aliyê DAIŞê ve hatibû revandin, rizgarkir û piştî dîlgirtina 11 salan vegerand Şengalê.
Xebatên ji bo rizgarkirina jinên Êzîdî yên ku di Fermana 74an a 3yê Tebaxa 2014an de ji aliyê DAIŞê ve hatine revandin didome. Li gorî nûçeya Ajansa Nûçeyan a Jinê (Nû JINHA) Yekîneyên Parastina Jinan (YPJ), Reham Hecî Hemê ya ji aliyê çeteyên DAIŞê ve hatibû revandin, piştî 11 salan rizgar kir. Reham Hecî Hemê duh êvarî ji aliyê YJŞê û YBŞê ve radestî malbata wê hate kirin. Rehama ku ji Xanesorê ye, ji hêla malbatê û jinan ve bi tilîlî û dîlanan hat pêşwazîkirin.
‘Ez ê fermanê tu carî ji bîr nekim’
Reham Hecî ku dema dîl ketibû destê çeteyên DAIŞê 11 salî bû û niha 22 salî ye, ji Nû JINHAyê re hestên xwe wiha anîn ziman: “Ez destpêkê spasiya YPJê û YJŞê dikim ku ez ji destê çeteyan xilas kirin. Ez bi biçûkatî ketim destê çeteyan û piştî 11 salan ez teslîmî malbata min kirin. Ji bo dîtina malbata xwe ya careke din min hêviya xwe qut kiribû. Niha piştî 11 salan hemû malbata min kom bûye û ez di nav wan de me. Ez ê fermanê û tiştên ku jiyame tu carî ji bîr nekim û hêvî dikim ku hemû jinên dîlgirtî bêne rizgarkirin.”
‘Min keça xwe wek şehîd îlan kiribû’
Dayîka Reham Hecî jî kêfxweşiya vegera keça xwe bi van hevokan vegot: “Bi dîtin û hatina keça min hemû dinya bû ya min. Min keça xwe wek şehîd îlan kiribû lê hezar caran şikir piştî 11 salan keça min li min vegeriya. Ez spasiya hemû şervanan dikim ku keça min xilas kirin. Bi taybetî ez spasiya xwe ji YPJê re dikim.”
‘Heta ku jineke Êzidî di destê çeteyan de bimîne em ê têkoşîna xwe bidomînin’
Di dema radestkirina Reham a malbatê de li ser navê YJŞê Sozdar Şengalî axivî û wiha got: “Jineke Êzidî ji hêla YPJê ve ji destê çeteyan hat rizgarkirin û em jî wek YJŞ û YBŞê çûn, me jina Êzidî anî Şengalê û radestî malbatê kir. Em li ser navê YJŞê û YBŞê spasiya hevalên xwe yên YPJê, YPGê û QSDê dikin. Têkoşîn û berxwedana me ji bo rizgarkirina hemû jinên Êzidî yên dîl e û wek YJŞ û YBŞ soza me jî ev e. Cihê kêfxweşî û şanaziyê ku jina Êzidî Reham piştî 11 salan vegeriya Şengalê û em radestî malbata wê dikin. Heta jineke Êzidî jî di destê çeteyan de bimîne em ê têkoşîna xwe bidomînin.”
‘Nêzîkî salvegera fermanê kêfxweşiya me mezintir kir’
Her wiha endama Meclîsa Jinê ya Digurê Semîra Berxwedanê jî ji Nû JINHAyê re axivî û wiha got: “Em wek Meclisên jinên TAJÊ xêrhatina jina Êzidî ku ji destê çeteyan hatiye rizgarkirin, dikin û em gelek kêfxweş in. Em spasî ji hêzên YPJê û QSDê re dikin. Bi taybetî nêzîkî fermanê rizgarkirina jina Êzidî kêfxweşiya me hîn mezintir kir. Hêvîdar im hemû jinên dîlgirtî werin rizgarkirin.”
Reham piştî radestî malbatê hat kirin, malbat ew bir mala xwe ya li Xanesorê. Reham li mala xwe ya Xanesorê bi tilîlî û govendan hat pêşwazîkirin.
