Li Stenbolê bi pêşengtiya Platforma Saziyên Demokratîk Mitînga Azadiyê hate lidarxistin. Hevserokê DEM Partiyê Tuncer Bakirhan diyar kir ku êdî divê pêvajo neyê dirêj kirin û çareserî pêk bê. Qanûna Çarçove navê demokrasiyê ye û got: “Qanûna Çarçove dê rêya demokrasiyê veke. Yek mûhattap heye ew jî birêz Abdullah Ocalan e.”
Bi pêşengiya Platfroma Saziyên Demokratîk li Stenbolê Mitînga Azadiyê hat lidarxistin. Mitîng li Qada Baxcilarê bi dirûşmeya “Bi Rêbertiya Azad Ber Bi Azadiyê ve Dimeşin” hat lidarxistin. Ji danê sibehê ve li gelek bajarên derdorê Stenbolê gelek kes hatin Stenbolê. Mitîng bi tevlibûna hezaran kesan bi coş dest pê kir. Bi hezaran kes bi cil û bergên xwe yên Kurdî tev li mitînge bûn. Hezaran kes bi dirûşmeyên “Jin Jiyan Azadî” û “Bijî Serok Apo” ketin qada mitîngê. Parlamenterên DEM Partiyê, Dayikên Aştiyê, rêveberên partiyên siyasî û saziyên civakî û hezaran welatî tev li mitîngê bûn. Di mitîngê de sînemagerê navdar Kadîr Înanir ê ku di 26ê Hezîranê de jiyana xwe ji dest dabû hate bîranîn.
Mitîng bi deqeyekî rêzgirtinê ya ji bo bîranîna cangoriyên di têkoşîna azadiyê de jiyana xwe ji dest dane dest pê kir. Piştre dirûşmeya “Şehîd Namirin” hat berzkirin.
Piştî rêzgirtinê Komîteya Amedekar a mitîngê gel silav kir û Berdevka DEM Partiyê Ayşegul Dogan derket ser dikê û axivî.
‘Em dizanin ku kesê pêvajoyê xurt bike birêz Abdullah Ocalan e’
Ayşegul Dogan diyar kir ku dilê herkesî tijê ye û got: “Ji Mersîn û Wanê heta Amed û Stenbolê hûn dengê xwe bilind dikin. Em îro ji bo Mitînga Azadiyê kom bûn. Bi salan e ji bo ked, aştî û azadiyê em têdikoşîn. Ji bona wê bi salan e gotinên me bi peyva aştiyê dest pê dike. Em dizanin êş çiye, me tu êş ji bîr nekir, hemû di dilê me de ne. Edî em naxwazin bigirîn, em naxwazin ciwan û zarokên me bimirin. Me gelek êş kêşand, me koçberî dît, mirin dît. Bi keda gelê xwe em hatin li vir. Divê em xwe rêxistin bikin û dengê xwe bilind bikin. Ev mitîng daxwazên me tîne ziman. Lê hin kes ji hin tiştan ditirsin. Ji azadiya birêz Abdullah Ocalan ditirsin. Birêz Abdullah Ocalan ev 27 sal e ji bo aştiyê têdikoşe. Îro divê bê fikirandin ku em çima dibêjin divê şert û mercên Ocalan bê baş kirin. Ji ber ku gumanên me hene. Em dizanin ku kesê pêvajoyê xurt bike birêz Abdullah Ocalan e. Ji bona wê îro em banga azadiyê dikin. Ew salên dijwar çûn divê êdî salên li hevhatî biborin. Me îro daxwazên xwe anîn ziman, ji îro şûnde jî em ê dîsa dengê xwe bilind bikin.”
Piştî axaftina Ayşegul Dogan peyama Rêberê Gelê Kurd Abdullah Ocalan a ji bo Kadîr Înanir şnadibû hate xwendin.
Paşê jî Hunermend Tara Mamedova derket ser dikê û stranên xwe got. Gel li ber stranan govend gerand.
‘Ji bo ku pêvajo bigihêje armanca xwe em li vir in’
Piştî konsera Tara Mamedova Hevserokê DEM Partiyê Tuncer Bakirhan axivî û destnîşan kir ku ew gelê ku ev qada tijê kirine silav dike û wiha axivî: “Îro em mitîngekê li dar dixin lê li aliyekê ve jî şînek heye. Hevalê me dostê Kurdan Kadîr Înanir jiyana xwe ji dest da. Em soz didin Gelê Behra Reş, gelê Tirkiyeyê ku em ê Komareke Demokratîk ava bikin. Me li çar bajaran Mitîngên Azadiyê li dar xistin. Îro gel nikarê debara xwe bikin sedema wê şer e. Ji bo şer bê rawestandin, girtiyên siyasî werin berdan û li vir bin, ji bo pêvajo bigihijê armanca xwe em li vir in. Me herdem got aştî. Îro ev qad gelek tişt dibêje, ev qad dengê çareseriyê ye. Hûn herdem xwedî li pêvajoye derketin û bi têkoşîna xwe we mesaya aştiyê saz kir.”
‘Êdî divê pêvajo neyê dirêjkirin û çareserî pêk bê’
Di berdewamiya axaftina xwe de Tuncer Bakirhan anî ziman ku êdî Tirkiye bi înkarkirina gelê Kurd pêş nakevê û got: “Rêya derketina ji koasê demokrasî ye. Pirsgirêka Kurd neyê çareserkirin demokrasî jî nayê. Divê êdî em dilrast bin û mafê Kurdan, Elewiyan û gelên din bidin. Îro behsa Qanûna Çarçove tê kirin. Divê tu kes neyê tune hesibandin. Herkes tev li qanûnan bibe. Êdî divê pêvajo neyê dirêjkirin û çareserî pêk bê. Qanûna Çarçove navê demokrasiyê ye, Qanûna Çarçove dê rêya demokrasiyê veke. Divê em di derxistina qanûnan de wêrek bin. Yek mûhattap heye ew jî birêz Abdullah Ocalan e. Birêz Abdullah Ocalan ji bo aştiyê bi salan e têdikoşe. Birêz Abdullah Ocalan dibêje êdî bila tu kes jiyana xwe ji dest nede. Têkoşîna me ji nûve dest pê dike. Ji bo Tirkiyeyeke Demokratîk, fermîkirina zimanê Kurdî em ê bixebitin.
Di dawiyê de Koma Agirê Jiyan derket ser dikê û mitîng bi coş berdewam dike.
