Li ser taloqkirina berdana Mehmet Saît Yildirim li navçeya Kanîreşê ya Çewligê daxuyanî hat dayîn. Di daxuyaniyê de bertek nîşanî ferzkirina dermankirina bi kelepçe hat dayîn û hat xwestin ku Mehmet Saît Yildirim tavilê serbest bê berdan.
Mehmet Sait Yildirim ê 75 salî ku girtiyê nexweş ê giran e û li Girtîgeha Girtî ya Ewlehiya Bilind a Tîpa F a Jimar 1 a Kiriklar a Îzmîrê dihat ragirtin, di 24ê Tebaxê de derket pêşberî Lijneya Îdare û Çavdêriyê (ÎGK) û berdana wî careke din hat taloqkirin. Piştî wê Mehmet Saît Yildirim di odeya xwe de krîza dil derbas kir û wî rakirin nexweşxaneyê. Niha rewşa Mehmet Saît Yildirim baş e.
Li ser taloqkirina berdana Mehmet Saît Yildirim li navçeya Kanîreşê ya Çewlîgê daxuyanî hat dayîn. DEM Partî, malbata Yildirim, xizmên wî û gelek welatî beşdar daxuyaniya ku li ber avahiya rêxistina DBPê ya navçeyê hat dayîn, bûn. Di daxuyaniyê de dirûşmeya “Bijî Berxwedana Zindana” hate berzkirin.
Metna daxuyaniyê Hevserokê DBPê ya Kanîreşê Ozkan Bîngol xwend û dû re malbata Mehmet Saît Yildirim axivî.
‘Piştî nîqaşên li lijneyê krîza dil derbas kir’
Hevserokê DBPê yê Kanîreşê Ozkan Bîngol bi bîr xist ku tevî ku ji meha Sibata 2025an vir ve mafê berdana bêmerc a Yildirim heye jî berdana wî tê astengkirin û wiha got: “Mehmet Saît Yildirim piştî di 24ê tebaxê de derket pêşberî Lijneya Îdare û Çavdêriyê, bi ferzkirina poşmaniyê ya lijneyê re rû bi rû ma. Piştî nîqaşa di lijneyê de krîza dil derbas kir. Piştî ku hevalê wî yê odeyê rewş ferq kir û xeber da, Mehmet Saît Yildirim berê sewqî nexweşxaneya li Bûcayê hat kirin, piştre jî bi sedema ku qawişê girtiyan tuneye birin Nexweşxaneya Bajar a Îzmîrê.”
‘Cendermeyan xwestin kelepçe têxin destê wî’
Ozkan Bîngol diyar kir ku Mehmet Saît Yildirim di 25ê Tebaxê de bi lezgînî hatiye anjiyokirin û hatiye tespîtkirin ku yek ji damarên sereke yên dil girtî ye û 2 stent hatine danîn.
Ozkan Bîngol behsa binpêkirina mafan a li dijî Yildirim ê ku xetereyeke giran a jiyanî derbas kiriye, kir: “Tevî vê tabloya giran jî, di dema razana li nexweşxaneyê de ji aliyê Cendermeyan ve hat xwestin ku destê wî bi cihê ve bikelepçe bikin. Ev sepana ku dijî rûmeta mirovan e li ser bertekan hat astengkirin. Ferzkirina tedawiya bi kelepçe li ser girtiyekî ku krîza dil a giran derbas kiriye û ji mirinê vegeriyaye, binpêkirineke eşkere ya mafan e. Tevî gotinên aştiya civakî û yekitiya hiqûqî, astengkirina berdana Mehmet Saît Yildirim nakokiyeke nayê qebûlkirin e. Biryarên kêfî yên Lijneyên Îdare û Çavdêriyê veguherîne mekanîzmeya înfazê ku rasterast mafê jiyanê tehdît dike. Mafê jiyanê û mafê tenduristiyê di tu qonaxa pêvajoya înfazê de nikare bê paşguhkirin. Em daxwaz dikin ku Yildirim di mercên guncav ên rûmeta mirovan de bê tedawîkirin û tavilê bê berdan.”
‘Ev sepana zextê li gorî pêvajoya ku tê meşandin re ne rast e’
Birayê Mehmet Saît Yildirim, Selîm Yildirim jî di destpêka axaftina xwe de kesên di têkoşîna azadiyê de jiyana xwe ji dest dane bi bîr anî û destnîşan kir ku birayê wî rêhevalê Mazlûm Dogan û Hayrî Dûrmûş e, ji ber ferzkirina poşmaniyê qebûl nekiriye înfaza wî hatiye şewitandin.
Selîm Yildirim bal kişand ser Pêvajoya Aştî û Civaka Demokratîk û axaftinên Serokkomarê Tirkiyeyê Recep Tayyîp Erdogan ên duh li Axlatê bi bîr xist û ev tişt vegot: “Di axaftina xwe de bang li hemû kesî dike ku piştgiriyê bidin pêvajoyê, lê gelo helwestên kêfî yên dozger û lijneyên xwe nabîne? Ev sepana zextê bê guman li gorî bi pêvajoya ku tê meşandinê, ne rast e.”
‘Em bi salan e li benda rêya wî ne’
Xwîşka wî Hanim Yildirim jî bertek nîşanî rewşa birayê xwe da û wiha got: “Birayê min nexweş e, ji dilê xwe anjiyo bû lê dîsa jî dixwazin destê wî bi kelepçe bikin. Ev zilm nayê qebûlkirin. Em dixwazin ku ew di demeke nêz de ji girtîgehê derkeve, kilîtên kelepçeyan bêne vekirin. Em bi salan e li benda rêya wî ne.”
‘Em ê li ber Edliyeya Îzmîrê dest bi greva birçîbûnê bikin’
Jinbiraya Mehmet Saît Yildirim, Vacîde Yildirim jî destnîşan kir ku malbat bi salan e berdêlên mezin dide û wiha got: “Me di vê rêyê de canê xwe da. Ji bo axa xwe û mirovên me yên hêja yên ku bi me re têkoşînê dikin, em dixwazin Saît Yildirim di demeke nêz de serbest bê berdan. Dema me bihîst ku krîza dil derbas kiriye cîgera me şewitî. Ew bi xwe nexweş e, dewlet jî vê yekê dizane. Salek berê birayê wî ji hesreta wî krîza dil derbas kir û wefat kir. Birayên wî yên din jî nexweş in, li benda rêya wî ne. Eger neyê serbestberdan em ê li ber Edliyeya Îzmîrê dest bi greva birçîbûnê bikin.”
