Nawenda Nûçeyan – Li Rojhilatê Kurdistanê û Îranê, hêzên rejîmê bi hemû rêbazên tund û hişk êrişî xwepêşandan û çalakgeran dike. Di êrişan de ciwan tên kuştin û nexweşxane tên dorpeçkirin. Tevî zext û girtinan jî daxwaza azadiyê ranaweste.
Çalakiyên li Îran û Rojhilatê Kurdistanê ku li dijî krîza aborî dest pê kir û veguherî çalakiyên li dijî zextên polîtîk û binpêkirina mafên mirovan û daxwaza azadiyê. Berxwedana gelên Îranê di roja xwe ya 11emîn de berdewam dike. Tevî hemû hewldanên hêzên rejîmê yên ji bo tepisandina serhildanê jî xwepêşandan li sedan navendan belav bûye.
Ji 2 hezarî zêdetir kes hatin girtin
Li gorî agahiyên dawî yên ji herêmê, di encama êrişên tund a hêzên rejîmê de bîlançoya şerê li kolanan giran dibe. Herî kêm 39 kes hatine qetilkirin. Zêdetirî 2 hezar kesî hatine binçavkirin û girtin.
Li bajarên wekî Sine, Kirmanşan, Mahabad, Seqiz û Îlamê yên bi ser Rojhilatê Kurdistanê ve, hêzên rejîmê bi çekên giran û guleyan êrişî xelkê sivîl dikin. Li van herêman, Kurd ne tenê ji ber aboriyê, lê ji ber parastina nasnameya xwe ya neteweyî û azadiyê jî li qadan in.
Rejîmê du birayên ciwan kuşt
Li taxa Ceiferava ya Kirmaşanê, du birayên ciwan bi navên Resûl Kidîweriyan (17) û Riza Kidîweriyan (20) hatin kuştin. Hat ragihandin ku rejîm zextê li malbatê dike da ku kurên wan wek endamên “Basîc” (hêzên paramîlîter) werin nîşandan, bi armanca veşartina tawanên xwe.
Birîndar tên rewandin
Yek ji bûyerên herî giran li Nexweşxaneya Xumeynî ya Îlamê qewimî. Hêzên rejîmê bi gaza îsotê avêtin nexweşxaneyê û hewl dan birîndaran birevînin. Meysem Nûrî (21) ku destê wî şikestî bû, ji nava nexweşxaneyê hat revandin.
Zarok û xwendekar di hedefê de ne
Rejîma Îranê di binçavkirinên komî de sînoran nas nake. Li bajarê Sineyê di rojekê de 10 çalakvan hatin girtin. Di nava girtiyan de herî kêm 4 zarok hene. Mamosteyê zanîngehê Nebî Umîdî û gelek xwendekar ji aliyê Spaha Pasdaran ve hatin revandin.
Banga ji bo saziyên navneteweyî
Saziyên mafên mirovan bang li Neteweyên Yekbûyî (NY) dikin ku zextê li Tehranê bikin da ku kuştin, girtin û tepisandina çalkiyên demokratîk rawestîne. Rêxistinên mafên mirovan û gel daxwaz dike ku komîsyoneke rasteqîn bê avakirin û êrişan û nexweşxaneyan lêkolîn bike û cenazeyên qurbaniyan bêyî şert û merc radestî malbatên wan werin kirin.
