Xizmên Windayan û rêveberên Komeleya Mafê Mirovan (ÎHD) a Amedê di hefteya 837emîn de li aqûbeta Metîn Can û Hasan Kaya pirsîn. Di çalakiyê de xwestin ku faîlên bûyerê werin darizandin.
Xizmên Windayan û rêveberên Şaxa Komeleya Mafên Mirovan (ÎHD) a Amedê di hefteya 837emîn de li ber Bîrdariya Mafên Mirovan a li Parka Koşûyolû çalakiya “Bila winda bên dîtin û faîl bên darizandin” li dar xistin. Malbatên windayan û rêveberên ÎHDê tev li çalakiyê bûn û wêneyên windayan hildan. Pankarta wêneyên windayan li sere li erdê hat raxistin.
Di daxuyaniyê de ewil Nûnerê Herêmê yê ÎHD Tahîr Saçakli axivî û bi wesîleya Roja Zimanê Dayîkê ya Cîhanê behsa zext û zordariyê dewletê yen li ser zimanê kurdî kir û wiha got: “Ji destpêka avakirina komarê heta îro zext û zordarî li ser zimanê kurdî hene. Di kongreya me ya ÎHDê de Vedat Aydin ji ber ku bi kurdî axivîbû hatibû binçavkirin û piştre jî hatibû kuştin. Ji bo vê ez birêzdarî Vedat Aydin bibîr tînim. Ji kesên ku hatibûn kuştin metîn Can û Hasan Kaya bûn. Du kesên hêja û bi nirx bûn.”
Xizmên windayan di hefteya 837emîn de aqûbeta Bijîşk Metîn Can û Parêzer Hasan Kaya ên ku di 21ê sibata 1993yan de li Xarpêtê hatibûn windakirin, pirsîn. Sekereterê Şaxa ÎHDê ya Amedê Omer Saman behsa çiroka Metîn Can û Hasan Kaya kir û got: “Du kes hatin ba bijîşk Metîn Can û gotin birîndarê me hene. Metîn Can û hevalê wî Hasan Kaya ber bi gundê Vertatîl ve ketin rê. Lê êdî tu agahî ji wan nehat. Paşê derket holê ku ew du kesên hatine yek ji wan endamê JITEMê Ayhan Oztûrk e. Lê li gel hemû serîlêdan û hewldanên malbat, rêxistinên demokratîk û Komeleya Mafên Mirovan(ÎHD) ji bo akûbeta wendeyan tu agahî bidest neketin.”
