Xelkê Amedê biryara Dadgeha Mafên Mirovan a Ewropayê û daxuyaniya Devlet Bahçelî ya derbarê Selahattîn Demîrtaş de nirxand û diyar kir ku divê Selahattîn Demîrtaş û tevahiya girtiyên siyasî tavilê bên berdan.
Dadgeha Mafê Mirovan a Ewropayê (DMME) duh carek din derbarê Hevserokê Giştî yê HDPê yê berê Selahattîn Demîrtaş de biryarek nû da. DMMEyê îtîraza Tirkiyeyê ya derbarê Demîrtaş de red kir û bi redkirina vê îtîrazê hat diyarkirin ku girtina Demîrtaş li dijî biryara mafên mirovan e. Bi vê biryarê re teqez bû divê Demîrtaş ji girtîgehê were berdan.
Serokê Giştî yê MHPê Devlet Bahçelî jî piştî civîna koma xwe ya li Meclîsê pirsên rojnamegeran bersivand û got: “Dê berdana birêz Selahattîn Demîrtaş ji bo Tirkiyeyê bibe wesîleya xêrê.”
Piştî biryara DMMEyê û daxuyaniya Bahçelî, me berê xwe da kolanên Amedê û ji welatiyan pirsî bê ka gelo derheqê berdana Demîrtaş û girtiyên siyasî de çi difikirin.
‘Neheqiyek mezin li Demîrtaş û girtiyên siyasî kirin’
Welatiya bi navê Nurhan Guzel diyar kir ku ew li bendê ne ku Demîrtaş were berdan û got: “Neheqîya gelek mezin li Demîrtaş û girtiyên siyasî tên kirin. Ev çend sal e di girtîhan de ne. Ez hêvî dikim ku Fîgen Yuksekdag û tevahî girtî dê werin berdan. Gelê Kurd bi wan ser bilind e.”
‘Sekna Demîrtaş li zora wan çû’
Welatiyê bi navê Tahsîn Aktaş jî diyar kir ku jixwe Demîrtaş girtiyekî siyasî ye û wiha axivî: “Demîrtaş ji bo li dijî desthilatê sekinî û helwesta xwe bi zelalî da nîşandan, hat girtin. Bahçelî tiştekî baş got, lê jixwe cezaya wî xelas bûye. Ez dixwazim tevahî girtiyên me bên berdan.”
‘Em hêvî dikin ku Demîrtaş demildest bê berdan’
Abdulsamet Gunduz jî destnîşan kir ku geşedanan dişopînin û ev yek anîn ziman: “Dadgeha Mafên Mirovan a Ewropayê biryar da û got divê Demîrtaş were berdan. Em hêvî dikin ku Demîrtaş demildest bê berdan. Ji tevahî gelê me re biryarên bên dayîn.”
‘Demîrtaş tu tiştekî nekiriye’
Salîh Çaliş jî anî ziman ku ev çend sal in tevahiya girtiyên siyasî bêsûc girtî ne û wiha got: “Tu sûcê wan tune ye, lê girtî ne. Demîrtaş çi kiriye? Tu tiştekî ji kesî nekiriye. Divê Demîrtaş û girtiyên siyasî di nava 24 saetan de hatiban berdan.”
‘Em gelek dixwazin Demîrtaş û tevahî girtî bên berdan’
Abdullah Atabay jî bi bîr xist ku gotina Devlet Bahçelî gelek balkêşe û got: “Bahçelî li Meclîsê baş axivî. Divê em bi hev re bijîn. Em gelek dixwazin Demîrtaş û tevahiya girtiyan bên berdan. Em dixwazin di nava aştiyê de bijîn. Her kes zimanê xwe biaxive. Kuştin bes e.”
‘Em azadiya Rêberê Gelê Kurd dixwazin’
Mecît Turgay jî anî ziman ku ji bal kişand ser biryara “mafê hêviyê” ya Rêberê Gelê Kurd Abdullah Ocalan û wiha got: “Heta ku Rêberê Gelê Kurd Abdullah Ocalan azad nebe, wateya berdana tu kesî tune ye. Bila Demîrtaş û tevahiyên girtiyên me bên berdan. Birêz Abdullah Ocalan azad bibe dê Kurdistan û gelê Kurd azad be.”
