Wezîrê Dadê Yilmaz Tunç, têkildarî biryara teqez a DMMEyê ya der heqê Selahattîn Demîrtaş de diyar kir ku biryar niha li ber destê dadgehê ye û ew li benda nirxandina dadgehê ne.
Wezîrê Dadê Yilmaz Tunç, li Antalyayê pirsên nûçegîhanên darazê bersivand. Yilmaz Tunç, têkildarî biryara teqez a DMMEyê ya der heqê Hevserokê Giştî yê HDPê yê berê Selahattîn Demîrtaş de got: “Ev ne biryara ewil a DMMEyê ye. Di demên berê de biryara wan a ji bo Ocalan jî heye, biryara Kavala heye. Biryarên hevdîtinên wan li Komîteya Wezîran didomin jî hene. Ya li vir, têkildarî Demîrtaş û Doza Kobanê ye. Demîrtaş û hevalên wî di 16ê Gulana 2024an de ji hêla 22yemîn Dadgeha Cezayên Giran a Enqereyê ve hatibûn mehkûmkirin. Li hinek bersûcan jî cezayên hefsê yên demkî û ji bo hinekan jî biryara beraetê hatibû dayin. Ev niha li 22yemîn Daîreya Cezayan a Dadgeha Edliye ya Herêma Enqereyê tê dîtin. Li vir, mafê azadî û ewlehiyê yê DMMEyê hat binpêkirin. Ji ber binpêkirinên têkildarî girtinê, ji ber vê îdiayê, bi hinceta binpêkirina madeya 5an a PMMEyê serlêdan hate kirin û Daîreya 2yan a DMMEyê jî biryara binpêkirinê da. Di raya giştî de nîqaş hatin kirin ka dê li dijî vê biryarê îtîraz were kirin an na.
Di pêvajoyên wiha de em dixwazin ku biryarên daîreyê li Daîreya Mezin a Giştî bên nîqaşkirin. Beriya biçe Daîreya Mezin jî paneleke ji 5 kesan pêk tê heye. Vê panelê jî got ‘hewcehî bi nîqaşkirina wê nîne’ û bi vê yekê re biryar teqez bû. Biryara daîreyê, niha li ber destê 22’yemîn Daîreya Cezayan a Dadgeha Edliye ya Herêmê ye û dê binirxînin. Di asta ewil de hukm hate dayin û ev hukm li îstînafê didome. Lewma jî nirxandina di vê mijarê de niha li ber destê dadgehê ye. Em tevek bi hev re bibînin ka dê dadgeh çi biryarê bide.”
