Amed– Welatiyên beşdarî 2yemîn kongreya rêxistina DEM Partiyê ya navçeya Sûrê ya Amedê bûn, diyar kirin ku daxwaza gelê kurd her tim aştiye û gotin: “Gelê kurd jidil destê xwe dirêj dike. Lê devlet qeyûman tayîn dike û êrîşî gelê Rojava dike.”
Parlamenterên Partiya Wekhevî û Demokrasiyê ya Gelan (DEM Partî) Pervîn Buldan û Sirri Sureyya Onder di 28ê Kanûna 2024an de li Girtîgeha Îmraliyê bi Rêberê PKKê Abdullah Ocalan re hevdîtin kirin. Piştî vê hevdîtinê, di 29ê kanûnê de peyameke ku ji 7 xalan pêk hat bi raya giştî re parvekirin. Şandeya ku ji Sirri Sureyya Onder, Pervîn Buldan û siyasetmedar Ahmet Turk pêk tê, piştî hevdîtina li Îmraliyê li ser xwesteka Abdullah Ocalan bi partiyên siyasî û siyasetmedarên girtî re hevdîtin kirin. Li ser wan hevdîtina ji bo çareseriyek demokratîk, rayedarên dewlet û hikûmetê li şûna gavan bavêje, her roj bi SÎHAyan êrîşî Bakur û Rojhilatê Sûriyê dikin. Her roj operasyonên siyasî pêş dixin. Rojnamegeran binçav dikin û digirin. Bi ser saziyan de degirin. Qeyûman tayînî şaredariyan dikin. Hîna di şerê li dijî kurdan de israr dikin. Ji ser geşedanên dawî welatiyên Amedê yên beşdarê kongreya rêxistina DEM Partiyê ya navçeya Sûrê bûn, nêrînên xwe Ajansa Welat re parve kirin.
‘Em bi têkoşîn û rêberê xwe bawerin’
Welatî Muşeher Ulker, dest nîşan kir ku piştî demeke direj agahî ji Rêberê PKKê Abdullah Ocalan girtin û bi vê yekê pir kefxweş bûn. Muşeher Ulker, da zanîn ku ji bo aştiyeke mayînde peyamên pir giring hatin parvekirin û got: “50 salên ev şer hêj berdewam dike. Serokê gelê Kurd Brêz Abdullah Ocalan ji bo aştiyê her tim gav avitiye û ked dide.”
Muşeher Ulker,, bal kişand ser daxwaza gelê kurd û wiha berdewam kir: “Gelê kurd her tim aştî û wekheviyê dixwazin. Lê Devleta Tirk bi salan e dibêje em ê wekheviyê çêbikin û hêsirên cavên dayikan rawestînin. Lê devlet tu gavan navêje. Em ji devletê bawer nakin. Daxwaziya me dayikan, aştî û wekhevî ye. Xwîn bi xwînê nayê şûştin. Xwîn bi aştî û wekheviyê tê şuştin.”
Muşeher Ulker, li ser zimanê rayedarên dewletê jî rawestiya û wiha axivî. “Dibêjin em ê çekên wan bin erd bikin. Lê bila baş bizanibin ku 50 sal in em têk neçûn. Em ê tu carî jî têk neçin. Em têkoşîna xwe û bi rêberê xwe bawerin. Hewceyî bi avêtina gavên şênber heye. Lê divê devlet baş bizanibe ku ew gavan neave jî em ji wan natirsin.”
‘Devleta Tirk gel dixapîne’
Welatî Ensar Ateş jî diyar kir ku Devleta Tirk baş dizane ku daxwaza gelê kurd çiye û wiha got: “Gelê kurd gav diavêje. Lê Devleta Tirk gel dixapîne. Gelê kurd jidil destê xwe dirêjî dewletê dike. Lê devlet hîna jî gav neavitiye û dîsa qeyûman tayînî şaredariyê gel dike. Êrîşî Bakur û Rojhilatê Sûriyeyê dike. Êrîşî bendava Tişrînê dike. Hewceye ku devlet gavên şênber biavêje. Divê hemû partiyên sivîl û saziyên demokratîk jî piştgiriyê bidin vê pêvajoyê.”
Yekîtiya gelê kurd ferz e
Welatî Nedîm Akkoç jî bi lêv kir ku ev pêvajo bi taybetî ji bo gelê kurd û hemû gelan pêvajoyeke pir giring e û wiha axivî: “Divê hemû kes jidil nêzîkî pêvajoyê bibe. Lê mixabin em piratîkê de vê jidiliyê nabînin ji ber ku devlet li aliyekî dibêje aştî lê aliyê din erîşê Rojava dike û li bendeva tişrînê gelên sîvîl qetil dike. Divê aqilê xwe bidin serê xwe û bizanibin ku kurd êdî xurtin û ne kurdên berêne. Ji bo aştiyê divê jidil nêzîkî pêvajoyê bibin û divê yekitiya gelê kurd çêbibe.”
