Gelê Amedê derbarê qanûnên çarçove yê de nêrînên xwe anîn ziman û ji bo pêşvebirina pevajoyê bang li desthilatdariyê kirin û wiha gotin: “Gava yekem diyarkirina statûya Rêber Apo ye. Pêvajo pir girîng e divê her kes lê xwedî derkeve.”
Pêvajoya “Aştî û Civaka Demokratîk” ya Rêberê Gelê Kurd Abdullah Ocalan di 27ê Sibata 2025an de daye destpêkirin, didome. Di çarçoveya pêvajoyê de di 5ê Tebaxê de “Qanûna Çarçoveyê” ya ji 12 xalan pêk tê, ji Meclisê re hat şandin. Qanûn di 8ê Tebaxê de ji Komîsyona Edaletê ya Meclisê re derbas bû û herî dawî di 10ê Tebaxê de bi erêkirina 467 parlamenteran li Desteya Giştî ya Meclisê hat qebûlkirin. Bi qebûlkirina vê qanûnê pêvajoya “Aştî û Civaka Demokratîk” derbasî qonaxeke nû bû. Gelê Amedê derheqê “Qanûna Çarçoveyê” de ji ajansa me re axivî.
Gelê Amedê diyarkirin ku piştî derbaskirina 12 xalên qanûnê divê gava yekem diyarkirina statuya Rêberê Gelê Kurd Abdullah Ocalan be û wiha gotin: “Ji bo xwişk û biratiya gelê Kurd û Tirk hewce ye çareseriyekê nû were avakirin. Em ji aliyê dewletê ve bifikar in, samîmî nayê. Dewleta Tirk xayîne baweriya me bi wî tune ye. Ev du sal in pevajo destpê kiriye lê hê jî mafên me nehatine dayîn. Edî em bindestiyê naxwazin. Em dixwazin kesên ku di girtîgehan de bigihîjin azadiya xwe. Em nasnameya Kurd dixwazin û em dixwazin bi hev re li wî welatî bijîn. Daxwaza me ew ku gerîlayên serê çiya jî werin tev li nava gel bibin, hesreta dayikan biqede.”
