Amed – Welatiyên Amedê têkildarî pêvajoyê diyar kirin ku aştî yek alî nabe û divê dewlet jî gavên hiqûqî û siyasî bavêje û gotin: “Gelê Kurd peywira xwe bi cih anî. Niha divê dewlet jî gavan biavêje.”
Rêberê Gelê Kurd Abdullah Ocalan di 27ê Sibatê de banga “Aştî û Civaka Demokratîk” kir. Piştî bangê Partiya Karkerên Kurdistanê (PKK) di 12ê Gulanê de encamnameya kongereya xwe eşkere kir û ragihand ku xwefesix kiriye. PKKê gav avêt û xwe fesix kir. Gelê Kurd dixwaze êdî dewlet jî gavan biavêjê. Welatiyên Amedê têkildarî pêvajoyê ji Ajansa Welat (AW) re axivîn.
‘Em dixwazin xwîn êdî nerije’
Welatiyê bi navê Eyup Aydenîz diyar kir ku 50 sal in li Rojhilata Navîn, Kurdistanê û Tirkiyeyê şer didomê û wiha axivî: “Çiqas zêde şer hebe ew qas zêde pêwistî bi aştiyê heye. Em dixwazin aştî pêk bê. Lê gumanên me ji dewletê hene. Partiya desthilatdar behsa aştiyê dike lê heta îro tiştên ku ji dewletê tên payîn tewletê pêk neaniye. Dewlet pêvajoyê direj dike. Baweriya me ji wan tune ye. Ji ber ku dibêjin aştî lê şerê wan didome. Ev nakokiyeke mezin e. Ji ber vê yekê divê dewlet durist nêzî pêvajoyê bibe. Li welatê me û Amedê gelek xwîn hate rijandin. Em dixwazin ku êdî xwîn nerije, keç û xortên me êdî neyên kuştin.”
‘Aştî yek alî nabe’
Eyup Aydenîz da zanîn ku ew dixwazin aştî pêk bê û wiha pêde çû: “Lê aştî yek alî nabe. Aliyek ji bo aştiyê gavan bavêje, lê aliyê din şer berdewam bike aştî nabe. Em vê pêvajoyê gelek giring dibînin. Lê her ku diçe gumanên me zêde dibin. Divê demildest dewlet gavên şênber bavêje. Gelê Kurd her dem dibêje aktorê pêvajoyê Rêberê Gelê Kurd Abdullah Ocalan e. Îro dewlet jî qebûl dike. Eger aştî bê vî welatî dê Rêberê Gelê Kurd Abdullah Ocalan jî bigêje azadiya fizîkî. Aştî nîvco nabe. Divê aştî bê welatê me. Lê şertên aştiyê jî hene. Di serî de mafê perwerdehiya zimanê Kurdî heye. Aştî tenê bi gotinê nabe.”
‘Me erka xwe anî cih’
Welatiya bi navê Husniyê Daniş jî destnîşan kir ku ew aştiyê dixwazin û got: “Em dixwazin tevahî girtî bên berdan. Ez jî dayîka girtiyan im. Ji bo aştî pêk bê me peywîra xwe bi cîh anî. Niha dora dewletê ye. Em şer naxwazin. Em dixwazin gerîla û leşker neyên kuştin û dayikên gerila û leşkeran hêsir nebarînin. Em dixwazin bibin yek.”
‘Abdullah Ocalan divê azad bibe’
Welatiyê bi navê Giyasettîn Yildirim jî xwest gel ji zor û zahmetiyan rizgar bibe û got: “Gel pir zor û zahmetî dîtin. Em dixwazin gel ji van zordariyan xilas bibe. Edalet tiştekî gelek xweş e. Ez hêvîdar im ku birêz Abdullah Ocalan bê berdan dê aştî jî pêk bê. Diviyabû Birêz Ocalan zûde hatibûya berdan. Bila kes kesî nexapîne. Dewlet li aliyekî dibeje aştî, lê li aliyê din jî şer didomîne. Wisa nabe. Ji ber vê sekna dewletê êdî gel ji wê bawer nake.”
