Sazî û partiyên siyasî yên amadekar ên Mitîngên Azadiyê, li Wanê banga tevlibûna mitîngê ku dê sibê li Qada Newrozê bê lidarxisin, kirin û gotin: “Azadiya Rêberê Gelê Kurd gelek girîng e, em sibê Qada Newrozê tijî bikin û ji bo aştî û azadiyê biqîrin.”
Partiya Herêmên Demokratîk (DBP), Partiya Demokrasî û Wekheviyê ya Gelan (DEM Partî) û Tevgera Jinên Azad (TJA), ji bo “Mitînga Azadiyê” ya ku dê sibê li Wanê were darxistin, li Qada Newrozê daxuyaniyek dan. Di daxuyaniyê de bang li tevahiya gelê herêmê hat kirin ku beşdarî mitingê bibin.
Hevserokê DBPê yê Wanê Cemal Demîr li vir axivî û diyar kir ku pirsgirêka Kurdan û Rojhilata Navîn pirsgirêkeke dîrokî ye û berdewam dike. Cemal Demîr destnîşan kir ku Rêberê Gelê Kurd Abdullah Ocalan di sala 1993an de agirbestek îlan kiribû û gotibû ku ew dixwaze pirsgirêka Kurd bi rêya demokrasiyê çareser bikin. Cemal Demîr anî ziman ku dewlet tu carî ji vê helwestê re nebû bersiv û got: “Weke tê zanîn ji 27ê sibata 2025an ve pêvajoyek dest pê kiriye û di vê çarçoveyê Birêz Ocalan gavên dîrokî avêtin. Heta roja îro bi hewldaneke bêhempa û fedekariyeke mezin pêvajo ajot. Lewma azadiya Rêberê Gelê Kurd gelek girîng e, em sibê Qada Newrozê tijî bikin û ji bo aştî û azadiyê biqîrin.”
‘Werin dengê aştiyê bilind bikin’
Piştre Hevseroka DEM Partiyê ya Wanê Gulşen Kurt axivî û bal kişand ser girîngiya vîndarî û yekîtiya gel a di vê qonaxê de. Gulşen Kurt di axaftina xwe de bang li hemû welatî, ciwan û dayikên Wanê kir ku di sibê li Qada Newrozê amade bin û dengê aştiyê û azadiyê bilind bikin.
Daxuyaniya gerandina govendê bi dawî bû.
