Veysî Aktaş ku tev li civîna Qoserê bû diyar kir ku di vê pêvajoyê de kîjan alî xwe rêxistin bike ew ê serkeftinê bi dest bixe.
Li navçeya Qoserê ya Mêrdînê bi tevilbûna Veysî Aktaş ê ku 10 salan bi Rêberê Gelê Kurd Abdûllah Ocalan re li Girtîgeha Îmraliyê mayî, Parêzerê Abdûllah Ocalan Mazlûm Dînç, Hevşaredara Êlihê Gulistan Sonuk û hezaran welatiyan Civîna Aştî û Civaka Demokratîk hat lidarxistin. Wêneyên Abdûllah Ocalan di salona taybet a civîn pêk hatî de hatin daliqandin. Civînê bi rêzgirtina ji bo cangoriyên azadiyê destpê kir. Piştî rêzgirtinê Hevşaredara Êlihê Gulistan SonukÊ derbarê armanca civînê de agahî dan.
‘Dema azadiya Abdûllah Ocalan hatiye’
Piştî Gulistan SonukÊ parêzerê Abdûllah Ocalan, Mazlûm Dînç got ku êdî dema azadiya Ocalan hatiye û wiha axivî: “Serokê MHPê Devlet Bahçelî qala mafê hêviyê yê Ocalan kiribû. Ji xwe DMME beriya 10 salan di mijara mafê hêviyê de ji bo Ocalan biryar dabû lê heya îro ev biryar neketiye meriyetê. Îro demê azadiya Ocalan hatiye. Ev yek jî divê bi guhertina qanûnan pêk were. Ji bo pêşketina pêvajoyê divê qanûn werin guhertin û ev yek di destê qada siyasetê de ye.”
Encama civînan ê bi Ocalan re werin parvekirin
Veysî Aktaş di destpêka axaftina xwe de diyar kir ku Abdûllah Ocalan dixwaze gel guhdar bike û encamên van civînan dê weke rapor werin amadekirin û ji Ocalan re werin ragihandin.
Veysî Aktaş di berdewama axaftina xwe de bal kişand ser pêvajoya berê û axaftina xwe wiha berdewam kir: “Piştî pêvajoya 2015an dewlet ji nû ve hat dizaynkirin. Dema hewldana derbeya FETOyê pêk hat xwestin bi awayek cuda vê yekê bidin nîlandan lê di eslê xwe de hemû hewldan ji bo tunekirina Kurdan pêk hat. Îngîlîz û Îsraîl dixwazin Rojhilata Navîn ji nû ve saz bikin û dewleta Tirk ev yek dît. Piştî vê yekê berê xwe dan Serok Ocalan. Ji ber îro kî bixwaze di Rojhilata Navîn de tiştekî bike divê têkiliyê bi gelê Kurd re dane. Ji ber vê yekê Serokatî qala îtîfaka Kurd û Tirkan dike. Ji xwe gotina Devlet Bahçelî ya îtîfaka Kurd û Tirkan di encama civînên salekî yên bi Rêbertiyê re derket holê.”
Veysî Aktaş di dawiya axaftina xwe de diyar kir ku ew dikarin bi dilê xwe rêxistinbûyîna xwe avabikin û axaftina xwe wiha bi dawî kir: “Ger îro em nekarin xwe rêxistin bikin ev kêmasiya me ye. Divê em li xwe mikûr werin. Divê em ji xewê rabin û em xwe bigehînin rihê salên 1990î. Kî xwe rêxistin bike ew dê ser bikeve. Ger em xwe rêxistin bikin em, ew xwe rêxistin bikin ew dê serbikevin. Di encamê de hêzên derveyî pergalê hene û ev hêz dixwazin mudaxale bikin. Divê li hember van hêzan em xwe rêxistin bikin.”
Piştî axaftina Veysî Aktaş welatiyên tev li civînê bûne nêrînên xwe anîn ziman û civîn bi dawî bû.
