Endamê Sekreteryaya Îmraliyê Veysî Aktaş di panela ku bi pêşengiya ciwanan di Mîhrîcana Tetwanê hat lidarxistin de, bal kişand ser girîngiya pêvajoya Aştî û Civaka Demokratîk û got: “Çek ji bo me ne çareserî ye. Divê pêşiya siyasetê bê vekirin û em xwe rêxistin bikin.”
Li navçeya Tetwanê ya Bedlîsê di çarçoveya 58emîn Mîhrîcana Çand û Hunerê ya Tetwanê de bi pêşengiya ciwanan di eywaneke dawetê de panela “Aştî û Civaka Demokratîk” hat lidarxistin. Di panelê de pankarta “Ciwan pêvajoya aştî û civaka demokratîk dinirxînin” hat vekirin û endamê Sekreteryaya Îmraliyê Veysî Aktaş weke axiver cîh girt. Gelek ciwan û welatî tev li panelê bûn.
‘Cara yekem e dewletê Rêbertî wek sermuzakerevan qebûl dike’
Veysî Aktaş di destpêka axaftina xwe de destnîşan kir ku ev pêvajo xwedî giringiyeke dîrokî ye û bal kişand ser qanûna çarçoveyî. Veysî Aktaş got: “Dewletê Rêbertî wek muzakerevanê sereke qebûl kir û derbasî muzakereyê bû. Piştî gotina Devlet Bahçelî ya ‘Bila Ocalan bê Meclisê’, Rêbertî wek muhatab û muzakerevanê sereke hat dîtin. Di dîroka Kurdan de cara yekem e dewletê Rêbertî wek muhatab qebûl kir û ji bo çareseriya pirsgirêka Kurd li ser maseya muzakereyê rûnişt. Pirsgirêka Kurd divê bi siyaset û qanûnan bê çareserkirin.”
‘Kurd ne evîndarên çekê ne’
Veysî Aktaş bal kişand ser ku Kurd ji ber binpêkirina mafên xwe neçar man ku çekê hildin û wiha berdewam kir: “Di dîrokê de gelek berxwedan çêbûn, lê di qanûna ti dewletî de navê Kurdan nehat bicîhkirin. Îro qebûlkirina Rêbertî destkeftiyeke mezin e. Ev mesele dê bi siyasetê bê çareserkirin. Kurd ne evîndarên çekê ne, di eslê xwe de neçarî çekê bûn. Ji ber ku êrîşî me kirin, me ji bo parastina xwe çek hilda. Dewletê êdî ji me re got ‘werin bi siyasetê çareser bikin’. Me bi qanûna ku derketî re li çareseriya pirsgirêkan geriya, ev ji bo me destkeftiya herî mezin e.”
‘Sîstema hegemonîk çareseriyê naxwaze, divê em xwe rêxistin bikin’
Veysî Aktaş di dawiya axaftina xwe de bang li civakê kir ku xwe rêxistin bikin û axaftina xwe wiha bi dawî kir: “Wek ku Rêbertî dibêje, çek ji bo me ne çareserî ye. Divê pêşiya siyasetê bê vekirin. Divê em xwe rêxistin bikin; pirsgirêk ya me ye, çareserî di destê me de ye. Pirsgirêka Kurd ne pirsgirêkeke ji rêzê ye. Sîstema hegemonîk li hemberî te şer dike û naxwaze ev pirsgirêk bê çareserkirin, ji ber ku ev pirsgirêk bandorê li Rojhilata Navîn hemûyê dike. Birêz Ocalan Kurdên birîndar derman kir û kir îradeya siyasî. Ev 52 sal in ev şerê dijwar berdewam dike û Kurd têkoşînê dikin.”
Panel piştî beşa pirs û bersivan bi dawî bû.
