Tevgera Jinên Azad (TJA) li Wanê li dijî kuştin û qirkirina jinan meşek li dar xist. Di meşê de bal kişandin ser dosyeya Rojîn Kabaîş û Gulistan Doku û wiha hate gotin: “Em ê edaletê li kolanan, mafên xwe jî di nav berxwedanê de biparêzin.”
Tevgera Jinên Azad (TJA), li dijî kuştina jinan û bêedaletiyê li bajarê Wanê meşek girseyî pêk anî. Di meşê de pankarta bi nivîsa “Li dijî qirkirina jinan û bêedaletiyê, niha dema jinê ye” hat vekirin. Jinan dimeşê de dirûşmên “Jin, Jiyan, Azadî”, “Pêlkiriniya mêr, bêdengiya dewletê”, “Rojîn Kabaîş serhildana me ye” û “Bijî berxwedana jinan” berz kirin. Gelek jin tevlî meşa ku li pêşiya Wan AVM ya Wanê dest pê kir, bûn û heta Qada Bajar berdewam kir.
‘Dosyaya Rojîn Kabaîş dosyaya bêedaletiyê ye’
Piştî meşê, li ser navê TJAyê Şehrenaz Gezîcî daxuyanî xwend. Gezîcî di destpêka axaftina xwe de bal kişand ser windabûn û mirina Rojîn Kabaîş a li Wanê û wiha axivî:“Ev mirin ji bo me bûyereke ji rêzê nîn e. Windabûna keçeke ciwan, piştî 18 rojan dîtina cesedê wê û piştî ewqas demê hîna zelalnebûna mirina wê, nîşan dide ku mafê jiyanê yê jinan di vê erdnîgariyê de çawa tê girtin. Em dipirsin, Çima ji roja yekem ve cidiyeta pêwîst di dosyeya Rojînê de nehat nîşandan? Çima ji bo eşkerebûna rastiyê zexta jinan û raya giştî hat li bendê girtin?”
’Polîtîkayên şerê taybet û rejîma bêcezatiyê’
Şehrenaz Gezîcî destnîşan kir ku bêcezahiştin rejîmek e û bandorê li ser tevahiya dosyeyên jinan dike: “Lêpirsînên ku tên derengxistin, delîlên ku nayên nirxandin û piştguhkirina îdîayan temenê vê bêcezatiyê mezin dikin. Dosyeya Gülistan Doku jî mînaka herî diyar e ya vê yekê ye. Tu meqam ji mafê jiyanê yê jinan bilindtir nîn e. Erka dewletê ne parastina hêzdaran e, derxistina rastiyê ye. Polîtîkayên şerê taybet dixwazin îrade û jiyana jinê bêqîmet bikin.”
’Em bêdeng nabin, em ê edaletê bînin’
Şehrenaz Gezîcî di dawiya daxuyaniyê de bang li hemû jinan kir ku piştgiriyê bidin hev û daxuyaniya xwe wiha bi dawî anî: “Têkoşîna me tenê daxwaza edaletê ya piştî kuştinê nîn e; em jiyaneke azad, wekhev û ewle ji bo jinan diparêzin. Li ku derê azadiya jinê tune be, li wê derê demokrasiyek rastîn jî tune ye. Heta ku hemû pirsên li ser mirina Rojîn Kabaiş werin bersivandin û rastî derkeve holê, em ê vê dosyeyê bişopînin. Em ê bêdeng nemînin, ji ber ku bêdengiyê ti jin neparastiye. Em ji bo Rojînê edaletê û rastiyê dixwazin.”
