Serokvekîle DEM Partî Sezai Temellî di civîna çapemeniyê de diyar kir ku ji bo çareseriya pirsgirêka Kurd divê komîsyon erka xwe pêk bîne û bi Rêberê Gelê Kurd Abdullah Ocalan re hevdîtinê bike.
Serokvekîlê Koma Partiya Wekhevî û Demokrasiyê yê (DEM Partî) Sezaî Temellî tekildarî geşedanên di rojevê de li meclise daxuyanî da çapemeniyê. Sezaî Temelli bal kişand ser salvegera Malazgirê û got: Gelê Kurd û Tirk hezaran sal in bi xwişk-biratî dijîn. Pêvîste ew xwişk-biratî bi qanûnan di çerçoveya hemwelatiya wekhev de bê mîsogerkirin. Sezaî Temellî bal kişand ser komîsyona li meclîsê hatiye avakirin û wiha domand: “Divê komîsyon êdî girîngiya karê xwe zanibe. Divê êdî balê bikişîne ser mijara esasî. Ji bo erka xwe pêk bîne divê bi baldarî gavên pêwîst bavêje û rêya xwe bidomîne. Ji daxuyaniya birêz Numan Kurtulmuş em fêr bûn ku heta nîvê meha Îlonê dê li heyetan guhdarî bikin. Guhdarîkirina heyetan girîng e. Beşdariya civakê ya komîsyonê girîng e. Divê bi lezgîn komîsyon biçe ba gelek kesan. Bi wan re têkiliyê deyne û raman û pêşniyarên wan bigire. Lê ev ne karê esasî ye. Ev yek bi destê komîsyonek jêrîn dikaribû bê kirin. Karê esasî yê komîsyonê divê zûtir nexşeyên hiqûqî yên ku vê serdemê pêwîstî bi wan heye amade bike. Ji bo amadekirina van nexşeyan jî xebatek bi fedakarî û bi baldarî pêwîst e.”
‘Li vî welatî 25 milyon Kurd dijîn’
Sezaî Temellî di berdewama axaftina xwe de bal kişand ser destûr nedayina axaftina bi Kurdî û wiha pê dê çû: “Dayikên Aştiyê hatin. Lê qebûl nekirin ku bi Kurdî biaxivin. Di Meclîsa Giştî de meclîsek heye ku du hevokên Kurdî tahmûl nake. Erê, zimanê fermî yê xebata meclîsê Tirkî ye. Lê carcaran mirov dikarin xwe bi zimanên cuda îfade bikin. Di vî welatî de 25 mîlyon Kurd dijîn û hejmara malbatên ku her diçe zêde dibin. Bi rastî jiyanek pirzimanî dimeşînin. Hem bi Kurdî, hem bi Tirkî. Ev rastiya welatê me ye. Ji ber vê yekê, paşguhkirina Kurdî, ev kiryarên li hemberî Kurdî bi rastî şermek mezin e. Divê ev şerm bi dawî bibe. Em di vê mijarê de bang li Serokê Meclîsê jî dikin. Divê meclîs zûtirî ji vê şerma xwe vegere. Êdî em hewceyî xebateke meclîsê ne ku rastiya civakê nas dike.”
‘Divê komîsyon bi birêz Abdullah Ocalan re hevdîtin bike’
Sezaî Temellî destnîşan kir ku ji bo komîsyon karê xwe bigihîne encamekê divê bi Rêberê Gelê Kurd Abdullah Ocalan re hevdîtin pêkbîne û wiha got: ” Ji bo komîsyon karê xwe bike, divê bi birêz Ocalan re hevdîtinê bike. Divê bi rêk û pêk hevdîtinê bike. Divê rê û rêbazên vê yekê zûtirekî bên dîtin. Komîsyon nikare vê mijarê paşguh bike. Ji ber ku muhatabê esasî yê vê meselê birêz Ocalan e. Ew kesê ku mesele derxistiye holê, rêya çareseriyê nîşan daye û sedema bingehîn a avabûna vê komîsyonê ev e. Komîsyona ku bi birêz Ocalan re hevdîtinê neke, nikare bimeşe. Ji ber wê divê zûtir biçe Îmraliyê. Divê her kes ji bo hevdîtinê bibe alîkar.”
Sezaî Temellî bal kişand ser komkujiya li Xazeyê jî û got: “Divê hemû kes û saziyên mafê mirovan ên navneteweyî bikevin dewrê. Yek jî pirsgirêka Rojhilata Navîn pirsgirêka Suriyeyê ye. Çareseriya demokratîk a Sûriyê pêwîst e. Rêya çareseriya demokratîk a Sûriyê ji teşhîskirina rast a rastiya Rojava derbas dibe. Bi têgihîştineke yekalî rêveçûn ne mimkun e. Eger wisa bûya, Sûriye wê di vê rewşê de nebûya.”
Sezaî Temelli bi lêv kir ku sedema qirîza aborî û enflasyona heyî jî pirsgirêka Kurd e û wiha bi dawî kir: “Çareseriya pirsgirêka Kurd, çareseriya pirsgirêkên aboriyê ye.”
