Ji bo endamê Şandeya DEM Partî ya Îmraliyê Sirri Sureyya Onder li Şîşliyê şîn hat danîn. Ewilî Serokê Giştî yê Partiya DEVAyê Alî Babacan hat serdana şînê. Dê şîna Onder sê rojan berdewam bike.
Endamê Şandeya Partiya Wekhevî û Demokrasiyê ya Gelan (DEM Partî) ya Îmraliyê û Serokwekîlê Meclisê Sirri Sureyya Onder ku piştî 18 rojên li nexweşxaneyê di 3ê Gulanê de jiyana xwe ji dest da. Onder duh bi merasîmek heyebet li Goristana Zîncîrlîkûyû ya Stenbolê hat veşartin. Ji bo Onder li Navenda Pêşandanê ya Cemal Reşit Rey a li navçeya Şîşliyê ya Stenbolê şîn hat danîn. Malbata Sirri Sureyya Onder, Hevserokên Giştî yên DEM Partiyê Tuncer Bakirhan û Tulay Hatîmogullari, Hevserokên Giştî yên Partiya Herêmên Demokratîk (DBP) Çîgdem Kiliçgun Uçar û Keskîn Bayindir, endama Şandeya DEM Partî ya Îmraliyê Pervîn Buldan, siyasetmedarê Kurd Ahmet Turk û parlamenterên DEM Partiyê li cihê şînê amade ne û mêvanan pêşwazî dikin. Li cihê şînê wêneyê Sirri Sureyya Onder hat daliqandin û find hatin pêxistin. Her wiha rêxistinên DEM Partiyê ya Stenbol û navçeyên wê jî di şînê de amade ne.
Serokê Giştî yê Partiya DEVA Alî Babacan û şandeya xwe hatin serdana şînê. Hevserokan û parlamenteran, Alî Babacan pêşwazî kirin. Di şînê de ji bo Sirri Sureyya Onder dua tên xwendin. Serdana şînê wê heta saet 17.00an berdewam bike. Hat zanîn ku dê şîn sê rojan bidome.
