Şêx Seîd û hevalên wî di salavegera 100emîn darvekirina xwe de li cihê hatibûn darvekirin hatin bibîranîn. Neviyê Şêx Seîd Kasim Firat ev tişt anî ziman: “Cihê gora wan aşkere bikin, cenazeyên wan teslîmî malbata wan bikin. Ev rûmeta me ye.”
Şêx Seîd û 46 hevalên wî di 29ê hezîrana 1925an de li Deriyê Çiyê ya navçeya Sûrê ya Amedê hatibû darvekirin, Şêx Seîd û hevalên wî di salavegera 100emîn darvekirina xwe de li cihê hatibûn darvekirin bi girseyî hatin bibîranîn. Xizmên Şêx Seîd, nûnerên partiyên siyasî û gelek kes tevlî bîranînê bûn.
Alîkarê Serokê Komaleya Perwerde, Çand û Piştevaniyê ya Şêx Seîd Ramazan Ari di bîranînê de axivî û anî ziman ku Şêx Seîd û hevalên wî nûnertiya têkoşîna heq, edalet û rûmetê ya gelê kurd dikin û wiha got: “Tevî ku 100 sal bi ser de derbas bû jî hîna cihê gora kesên hatin darvekirin nehat aşkerekirin. Ev rewş hem di wijdana malbatan û hem jî ya gel de birînekî kûr dihêle. Aşkerekirina cihê gora wan ne tenê ya malbatan, lê daxwaza gelekî ya rûbirûbûna bi dîrokê re ye.”
Ramazan Ari wiha bang li rayedaran kir: “Aştiya mayînde ya vî welatî bêyî rûbirûbûna bi dîrokê re û pêkneanîna edaletê re ne pêkan e. Aşkerekirina cihê gora wan ji bo aştiyê gavekî dîrokî ye. Em dixwazin bi nasnameyên cuda re di nava aştiyê de jiyan bikin. Em ê ji bo gihiştina vê armanca xwe têkoşîna xwe bidomînin.”
Mele Suleyman Kurşun jî di axaftina xwe de bal kişand ser pevçûnên li Rojhilata Navîn û wiha got: “Şêx Seîd di dilê gelê kurd de cih girt. Têkoşîna wî îro jî tê jiyîn. Rojhilata Navîn êdî ji şer bêzar bû. Ev erdnîgarî aştiyekî bi rûmet û edaletê dixwaze. Gelê kurd jî hêjayî vê mafê ye.”
Serokê Komeleyê û neviyê Şêx Seîd Kasim Firat jî di axaftina xwe de destnîşan kir ku polîtîkayên înkarê ku 100 sal in dewam dikin, nikarin çavê gelê kurd bitirsînin û wiha got: “Di sala 1925an de 47 kesên ku bêedaletî hatin darvekirin, serî netewadin. Me bi rêya Baroya Amedê serlêdan kir, lê cevap nehat dayîn. Cihê gora wan aşkere bikin, cenazeyên wan teslîmî malbata wan bikin. Ev rûmeta me ye.”
Berdevkê Însiyatîfa Yekîtiya Demokratîk Mehmet Kamaç jî diyar kir ku gelê kurd sed sal in rastî zext û komkujiyan tên û wiha axivî: “Li van xakan bi dehan rêber hatin darvekirin. Lê gelê kurd tu caran rêberên xwe bi tenê ne hiştin. Ev êş ji ber ne yekbûna kurdan e. Êdî dema yekîtiyê ye. Ev sedsal dibe ku bibe sedsala Kurdan.”
Serokê Giştî yê PSKê Bayram Bozyel jî di bîranînê de axivî û berxwedana Şêx Seîd û hevalên wî bi bîr anî.
Girse bêdeng heta qada ku lê hatibûn darvekirin meşiyan û dawî li çalakiya xwe anîn.
