Hevserokê Şaxa Egîtim Senê ya Hejmara 2yan a Amedê Serhat Kiliç têkildarî budçeya perwerdehiyê anî ziman ku butçeyê ji şer re vediqetînin û budçeya perwerdehiyê kêm dikin.
Wezareta Perwedehiyê diyar kiribû ku di 2025an de budçeya perwerdehiyê ji sedî 14,84ê hatiye veqetandin û ev budçeya perwerdehiyê 2 trilyon û 186 milyar lîreyê Tirk e. Saziyên sivîl û sendîka budçeyên ji bo wezaretan hatine veqetandin rexne dikin. Hevserokê Şaxa Egîtîm Senê ya Hejmara 2yan a Amedê Serhat Kiliç kêmasiyên budçeya perwerdehiyê nirxand.
Serhat Kiliç diyar kir ku niha di parlementoyê de rojev budçe ye, lê fikra gel û kedkaran nayê pirsîn û got: “Helbet di vê pêvajoyê de gelek rexne yê me hene. Budçe bi taybetî bi baca ji gel tê komkirin dii xezîneyê de kom dikin. Ev baca ku ji gel hatiye û di xezîneyê de kom bûye, dê çawa bê parve kirin? Lê mixabin li Tirkiyeyê tu carî ev pêvajo yên budçeyê demokratîk nebûye. Dabeşkirina butçeyê ji gel re girtî ye. Divê gel butçeyê diyar bike. Bi fikrên gel, bi fikrên kedkaran were diyar kirin.”
‘Divê budçeya perwerdehiyê zêde bikin’
Serhat Kiliç bal kişand ser kêmasiya budçeya perwerdehiyê û wiha got: “Di aliyê budçeya perwerdehiyê de gelek kêmasî hene. Em wek rêxistineke kedê dibêjin di budçeyê de divê para xizmetên giştî bê zêdekirin. Ev xizmetên giştî çi ne? Helbet perwerdehî, tendurîstî û xizmetên ku gel jê îstîfade dike ye. Divê ji bo xizmeta gel butçeyê zêde bikin. Butçeya ji şer re vediqetînin ji xizmeta gel kêm dikin. Niha li dibistanên ku li taxên xizan lê dijîn rewşa perwerdehiyê gelekî li paş maye. Mînakeke biçûk, xwendekarên ku niha ji bo ezmûnên giştî xwe amade dikin, nikarin xwe bigihînin çavkaniyan. Hewceye ku mamosteyên wan dibistana ji xwendekaran re fotokopiyan bikişînin û çavkaniyan peyda bike. Lê li gelek dibistanan makine ya fotokopiyê tune ye. Di her aliyê de budçe hewce ye. Lê mixabin li Tirkiyeyê em dinerin di berhevkirina bacê de, bêedaletî heye.”
Dê mîtîngan li dar bixin
Serhat Kiliç diyar kir ku dema bac tên komkirin li şer û sermayedaran tê parvekirin û ev yek anî ziman: “Em ê weke KESK di vê pêvajoyê de li çar bajaran ji bo budçeyê û Tirkiyeke demokratîk mitîngan li dar bixin. Em ê ji Amedê biçin Wanê û li wir budçeyeke demokratîk bixwazin.”
