Rageşiya navbera Hindistan û Pakistanê di saetên serê sibehê de veguherî bombardûmanê. Di navbera aliyan de şerekî giran heye. Di şer de kuştî zêde dibin.
Artêşa Hindistanê li ser sînorê Pakistanê li hemberî ‘binesaziya terorîstan’ êrişa bi fuzeyan kir. Pakistanê jî bi topan bersiv da. Di şer de ji aliyê Pakistanê herî kêm 26 kes, ji aliyê Hindistanê jî 8 kes hatin kuştin. Berdevkê artêşa Pakistanê ragihand ku 5 balafirên Hint anîne xwarê ku 3 jê balafirên Rafales ê Fransî, yek MiG29 û yek SU bû. Her wiha diayr kir ku balafireke bêmirov jî xistine.
Hikumeta Hindistanê îdîa kir ku ‘Ti ji navendên leşkerî yên Hindistanê nebûne hedefa wan’ û ji bo pêşî li şerekî mezin bigirin ‘bi berpirsyariyeke cidî’ tevgeriyane. Lê Wezareta Karên Derve ya Pakistanê ragihand ku ‘Van çalakiyên bêberpirsyarî yên Hindistanê 2 hêzên nukleerî aniye ber şer’.
Wezîrê Karên Derve yê Emerîkayê (DYE) Marco Rubio tevahiya şevê bi wezîrên karên derve yên Hindistan û Pakistanê re axivî û û banga ‘diyalog û berpirsyariyê’ kir. Qesra Spî ji bo rageşiya li herêmê mezin nebe bang kir. Çînê jî bang li herdu welatan kir ku xwe ji gavên ‘tevlîhevkirina rageşiyê vegirin’. Neteweyên yekbûyî destnîşan kir ku şerekî leşkerî ‘Ji bo cîhanê wê encamên welê bi xwe re bîne ku nayê qebûlkirin’.
Aliyekî din ê şer li ser çavkaniyên avê tê kirin. Serokwezîrê Hindistanê Narendra Modi demeke kurt beriya destpêkirina şer daxuyaniyek da û diyar kir ku çemên ji xaka Hindistanê diherike Pakistanê ‘wê êdî ji bo berjewendiyên Hindistanê bê bikaranîn’. Ev daxuyanî weke rabûna li ber Peymana Avê ya Indusê hate şîrovekirin ku di sala 1960’î de di navbera Hindistan û Pakistanê de hate mohrkirin. Hindistanê heman piştî êrîşê tevlîbûna xwe ya li vê peymanê rawestand. Pakistanê jî Hindistan sûcdar kir ku bi guhertina herikîna Çemê Çenabê re peyman binpê kiriye. Pispor dibêjin gefa ‘birîna avê’ ya Modi ji bo dema kurt ne ya bicihanînê ye, lê belê di navbera hedu welatan de krîzeke nû diafirîne.
Duh jî hikûmeta Hîndîstanê li dijî Keşmîrê ya Pakîstanê êrîşa hewayî pêk anîbû. Li aliyê din artêşa Pakistanê jî li dijî Hindistanê êrîşî sê nokteyên cuda kiribû. Berdevkê Artêşa Pasîstanê jî anîbû ziman ku di êrîşan de 26 kes hatine kuştin û 46 kes jî birîndar bûne.
Piştî niqaşên di navbera Hindistanê û Pakistanê de li Keşmîrê di 22ê Nîsanê de 26 turîst hatibûn kuştin. Piştre di saetên serê sibê yên îro de Hindistanê êrîşên hewayî pêk anîbû.
