Amed – Welatiyên Amedê derheqê pêvajoya “Aştî û Civaka Demokratîk” de axivîn û gotin: “Ji bo aştî pêk werê divê birêz Abdullah Ocalan azad be.”
Rêberê Gelê Kurd Abdullah Ocalan di 27ê Sibatê de banga “Aştî û Civaka Demokratîk” kir û piştî bangê pêvajoyê dest pê kir. Bi dû banga dîrokî Abdullah Ocalan re Partiya Karkerên Kurdistanê (PKK) jî di 5-7ê Gulanê de kongeraya xwe ya 12emîn pêk anî û biryara xwefexiskirinê ragihand. Her wiha Koma Aştî û Civaka Demokratîk ku ji gerîlayan pêk dihat di 11ê Tîrmehê de li Şikefta Casenê ya li Silêmaniya merasîmek dîrokî li dar xist û çekên xwe îmha kirin. Herî dawî jî di 26ê Cotmehê de dîsa komeke gerîla li Qendîlê daxuyanî da û ragihandin ku wan hêzên xwe ji Bakurê Kurdistanê û Tirkiyeyê vekişandine.
Tevî gavavêtina Abdullah Ocalan û PKKê jî ji bilî avakirina komîsyonê heta niha ji hêla desthilatê û dewletê ve tu gavên şênber nehatine avêtin. Gavneavêtin di nav raya giştî de baweriya bi pêvajoyê jî qels dike. Heta niha têkildarî şert û mercên Abdullah Ocalan ku aktorê sereke yê pêvajoyê jî tu guhertin nehatine kirin.
Xelkê Amedê derheqê pêvajoyê û şert û mercên Abdullah Ocalan de ji Ajansa Welat re axivîn.
‘Mifteya aştiyê di destê Serok Apo de ye’
Welatiyê bi navê Celal Kezer destnîşan kir ku ew dixwazin dewlet jî ji bo aştiyê gavên erênî û şênber biavêje û got: “Divê Rêber Apo û tevahiya girtiyan bên berdan. Lê heta îro ji aliyê dewletê ve tu gav nehatiye avêtin. Serok Apo û Selahattîn Demîrtaş neyên berdan, bi vî awayî aştî jî pêk nayê. Mifteya aştiyê di destê Serok Apo de ye.”
‘Birêz Abdullah Ocalan azad nebe pêvajo nameşe’
Zekî Yonca jî anî ziman ku dewlet gavên bi edaletî û şênber biavêje ew ê ji dewletê bawer bikin û wiha got: “Divê dewlet mafê zimanê me nas bike. Em dixwazin tevahiya girtiyên siyasî bên berdan. Birêz Abdullah Ocalan azad nebe pêvajo nameşe. Heke birêz Abdullah Ocalan, Selahattîn Demîrtaş û tevahiya girtiyan werin berdan dê pêvajo jî bimeşe.”
‘Heke birêz Ocalan neyê berdan ka wê aştî çawa pêk were?’
Mehmet Yaşa jî diyar kir ku ew dixwazin bi awayekî lezgîn aştî pêk were û wiha axivî: “Çi mafê gelê Tirk hebe divê mafên gelê Kurd jî hebin. Tevahiya girtiyan neyên berdan dê çawa aştî pêk were? Em aştiyê dixwazin. Ji bo aştiyê divê tevahî girtî bên berdan. Divê birêz Abdullah Ocalan were berdan. Heke birêz Abdullah Ocalan neyê berdan ka wê aştî çawa pêk were?”
‘Em dixwazin Abdullah Ocalan bê berdan’
Şehmuz Yeşîl jî da zanîn ku heke pêvajo hebe divê hemû girtiyên gelê Kurd bên berdan û ev yek anî ziman: “Bila dewlet me nexapîne. Em dixwazin Abdullah Ocalan bê berdan. Divê tevahî girtî bên berdan, Demîrtaş bê berdan. Em naxwazin kuştin çêbibe. Divê êdî dawiya zilmê werê.”
‘Em azadiya birêz Ocalan dixwazin’
Welatiyê bi navê Muhammet Emîn jî destnîşan kir ku ew aştî û azadiyê dixwazin û got: “Divê edalet were vî welatî, beriya her tiştî em edaletê dixwazin. Em azadiya birêz Abdullah Ocalan dixwazin. Tevahî girtî bên berdan wê gelek baş bibe.”
