Parlamentera HDPê ya berê Semra Guzel piştî ji girtîgehê derket, hat Amedê. Semra Guzel diyar kir ku ji bo pêvajo bigihijê armanca xwe divê em kedekî mezin bidin û got: “Ji bo pêvajo bimeşe divê birêz Abdullah Ocalan azad be.”
Parlamentera berê ya Partiya Demokratîk a Gelan (HDP) a Amedê Semra Guzel ku di çarçoveya dozek di sala 2017an de li dijî wê hatibû vekirin û parlementeriya wê hat xistin. Semra Guzel di 3yê Îlona 2022yan de hatibû girtin. Semra Guzel di rûniştina dawî ya di 3ê mijdarê de biryara tehliyeyê hat dayin û ji girtîgeha Jinan a Kandirayê hat berdan.
Semra Guzel di saetên şevê de hat Amedê û li balafirgeha Amedê ji aliyê Hevşaredarê Bajarê Mezin a Amedê Dogan Hatun, Parlamentera DEM Partî ya Amedê Ceylan Akça Cupolo, rêxistina DEM Partî û DBPê ya Amedê, malbata Guzel, Dayikên aştiyê, nûnerên SES, TJA, TUAY-DER û gelek kesan ve hat pêşwazîkirin. Girseyê di pêşwazîkirinê de dirûşmayên “Bijî berxwedana zindanan” û “Jin Jiyan Azadî” berz kirin.
Li wir Semra Guzel ji ajansa me re axivî û diyar kir bi şerê taybet û komployekî hat girtin û got: “Atmosfera wê demê li ser gelê Kurd û HDPê şerê taybet dihat meşandin. Dema hat ev girtim berxwedana me di girtîgehê de berdewam kir. Niha ku ez li Amedê me, cihê ku ez lê mabûm îro ez ê li wir berdewam bikim. Têkoşîna me dê berdewam bike. Îro pêvajoyekî girîng heye. Bi bangawaziya birêz Abdullah Ocalan pêvajo dest pê kir. Ji bo pêvajo bigihijê armanca xwe divê em kedekî mezin bidin. Hêviya me mezin e, bi vê hêviya em ê bigihijin armanca xwe. Lê di serî de ji bo pêvajo bimeşe divê birêz Abdullah Ocalan azad be. Girtiyên me azad be. Ji ber wê aliyek têkoşîna me têkoşîna azadiyê ye. Ev têkoşîn û berxwedan gel e. Em ji gel bawer in.”
