Şaxên ÎHDê ya Îzmîr, Riha, Sêrt, Êlihê diyar kir ku rewşa girtiyê nexweş Celal Yildirim ê ku li Girtîgeha Rihayê krîza dil derbas kiriye giran e û banga berdana lezgîn û taloqkirina înfaza wî kir.
Şaxên Komeleya Komeleya Mafên Mirovan (ÎHD) yên Îzmîr, Êlih, Sêrt û Rihayê derbarê Celal Yildirimê ku li Girtîgeha Tîpa T a No 2 ya Rihayê krîza dil derbas kiribû û derbarê rewşa wî ya tenduristiyê de daxuyanî dan.
ÎHDa Îzmîrê li avahiya komeleyê civîneke çapemeniyê li dar xist. Metna civînê ji aliyê Hevseroka Komîsyona Navendî ya Girtîgehan a ÎHDê Nazli Tûran ve hat xwendin.
RIHA
Şaxa ÎHDê ya Rihayê, ji bo girtiyê nexweş Celal Yıldırım daxuyaniya çapemeniyê li dar xist. Daxuyaniya li pêşiya Novada Park AVMyê hate lidarxistin, malbata girtiyê nexweş Celal Yildirim, rêveberên TUHAY-DER a Rihayê, Komeleya Hiqûqnasên ji bo Azadiyê (OHD), DEM Partî ya Rihayê û gelek kes beşdar bûn.
Metna daxuyaniyê ji aliyê Hevseroka Şaxa ÎHDê ya Rihayê Songul Arpa ve hate xwendin. Daxuyanî bi dirûşma “Bijî berxwedana zindana” bi dawî bû.
ÊLIH
Komîsyona Girtîgehan a Komeleya Mafên Mirovan (ÎHD) Şaxa Êlihê ji bo girtiyê nexweş Celal Yildirim li ber avahiya xwe daxuyanî da. Di daxuyaniyê de Rêveber û endamên DEM Partiyê û DBPê, OHD, Hevşaredara Êlihê Gulistan Sonuk û gelek kes beşdar bûn. Girseyê pankarta “Em di girtîgehan de ne mirinê jiyanê diparêzin” û “Bila girtiyên nexweş serbest bên berdan” hilgirtin. Metna daxuyaniyê ji aliyê Hevserokê Şaxa ÎHDa Êlihê Ahmet Şîray ve hate xwendin.
SÊRT
Komîsyona Girtîgehan a ÎHDa Sêrtê jî ji bo girtiyê nexweş Celal Yildirim li avahiya xwe daxuyanî da. Di daxuyaniyê de Rêveber û endamên DEM Partiyê û DBPê, Hevserokên Rêxistina DEM Partiyê yên Sêrtê û gelek kes beşdar bûn. Pankarta “Ez mafên mirovan diparêzim lewra; Mafê hemû kesiye ji xizanî û tirşe rizgar bibe” hate daliqandin. Metna daxuyaniyê ji aliyê Rêvebera ÎHDa Sêrtê Nezahat Celen ve hate xwendin.
Daxuyaniya hevpar a ji aliyê şaxên ÎHDê ve hate xwendin bi vî rengî ye:
“Piştî Celal Yildirim krîza dil derbas kir û rewşa wî ya tenduristiyê xirab bû, hat anjîyo kirin û 2 damarên dilê wî hatin vekirin. Celal Yildirim piştî anjîyoyê di yekîneya lênêrîna awarte de hate çavdêrîkirin û ji 2yê Cotmeha 2026an vir ve li nexweşxaneyê tê girtin. Li gorî agahiyên ji malbat û parêzerên Celal Yildirim hatine girtin, xetereya enfeksiyonê heye. Bikaranîna dermanan, nexweşiyên wî û temenê wî, sewqkirina wî ya dîsa ji bo girtîgehê ji bo tenduristiya wî xetereyeke mezin çêdike. Her wiha ligel nexweşiya dil, nexweşiyên şekir, tansiyon û fîtiq jî pê re hene. Tevlî vê yekê, li gorî agahiyan, tevî ku di Nîsana 2026an de mercên wî pêk hatibûn jî, bi hinceta ku ‘di halê baş de nîne’ ji azadiya biderfeta şertî sûd wernegirtiye.
Ji bo gihîştina derman û tedawiyê divê înfaz bê taloqkirin
Ji bo Celal Yildirim di gihîştina tedawiyê de pirsgirêkan nejî divê înfaza wî bê taloqkirin. Li gorî madeya 16an a Qanûna bi jimare 5275an a Cîbicîkirina Cezayê û Tedbîrên Ewlehiyê, di rewşa nexweşiya giran de taloqkirina înfaza cezayî pêkan e. Her wiha di çarçoveya madeya 17an a Destûra Bingehîn de mafê her kesî heye ku bijî û mûameleya li gorî rûmeta mirovan bibîne. Dewlet berpirsiyare ku jiyan û tenduristiya girtiyên di bin çavdêriya xwe de biparêze. Li gorî îctîhadên Dadgeha Mafên Mirovan a Ewrûpayê (DMME) jî, girtina girtiyên nexweşên giran ên di mercên girtîgehê de û ne peydakirina xizmeta tenduristiyê ya pêwîst, têrker û domdar, dibe sedema binpêkirina mafê jiyanê.”
