Şaxên ÎHDê têkildarî pênase û nîqaşên “Pêşeroja Civaka Demokratîk û Pêvajoya Aştiyê” daxuyaniyên hevpar dan û gotin: “Nîqaşên li ser pêvajoya aştiyê girîng in, lê tecrûbeyên cihanê nîşan didin ku bêyî misogeriya hiqûqî û siyasî bêçekbûn bi xwe re encamên mayînde nayne.
Riha
Şaxê Komeleya Mafên Mirovan (ÎHD) a Rihayê, li ser pênase û nîqaşên derbarê “Pêşeroja civaka demokratîk û pêvajoya aştiyê” de li avahiya Şaxa ÎHDê ya Navçeya Xelîliyê ya Rihayê civîneke çapemeniyê li dar xist. Endamên komeleyê û aktivîstên mafên mirovan beşdarî civînê bûn.
Hevseroka Şaxê ÎHDa Rihayê Songûl Arpa axivî û bal kişand ser nîqaşên amadekirina qanûna nû ya ji bo çareserkirinê. Songul Arpa diyar kir ku piştî agahiyên amadekirina zagonek nû hat rojevê, nîqaşên li ser çareseriya aştiyê zêde bûn û got: “Li gorî agahiyên ku ji raya giştî re hatine ragihandin, pêşniyara zagona hatî amadekirin zêdetir, mijara bêçekbûnê digire nav xwe. Lê belê dema ku em bala xwe didin tecrûbeyên navneteweyî, ev yek bi tenê ne bes e.”
‘Divê baweriya aliyan bi pêşerojê hebe’
Songûl Arpa derbarê mînakên pêvajoyên aştiyê yên li cîhanê hatine pêkanîn axivî û wiha got: “Di mînakên cîhanê de xala herî girîng ev e ku berdana çekan ji misogeriya hiqûqî û siyasî serbixwe nayê meşandin. Di hawîrdoreke ku alî ji paşeroja xwe bi guman bin dê mafên wan çawa bêne parastin? Bi tena serê xwe bêçekbûn encamên mayînde nade.”
Wan
Şaxa Komeleya Mafên Mirovan (ÎHD) ya Wanê, derbarê “Qanûna Çarçoveyî” li avahiya xwe ya navçeya Rêya Armûşê daxuyaniyek da. Rêveberî û endamên ÎHDê û parastvanên mafên mirovan tev li daxuyaniyê bûn. Di daxuyaniyê de parastvanên mafên mirovan xwestekên xwe yên aştiyê rêz kirin û bertek nîşanî pêşnexistina pêvajoyê dan. Metna daxuyaniyê ya ku tenê bi Tirkî hatibû amadekirin, ji aliyê endamê ÎHDê parêzer Sedat Kûla ve hat xwendin.
