Şaxa Komeleya Hiqûqnasên ji bo Azadiyê (OHD) ya Amedê 4êmîn kongreya xwe pêk anî. Di kongreyê de Endamê Buroya Hiqûqê ya Asrinê Prz. Mazlum Dînç û Hevseroka Giştî ya OHDê Ekîn Yeter bal kişandin ser tecrîdê û destnîşan kirin ku tecrîd didome.
Şaxa Komeleya Hiqûqnasên ji bo Azadiyê (OHD) ya Amedê li Navende Çand Amedê ya 4emîn kongreya xwe bi şiyara “Em ji bo aştiyeke bi rûmet berxwedana hiqûqa azadîxwaz mezin dikin” pêk anî. Li salonê panqartên “Em ê Tecrîdê Bişkînin û Hiqûqa Azadîxwez Avabikin”, “ Hiqûqa Jinê Hiqûqa Azadiyê ye” daliqandin.
Tecrîd didome
Rêxistina Partiya Wekhevî û Demokriyê (DEM Partî), Partiyan Heremên Demokratîk (DBP), Tevgera Jinên Azad(TJA) yên Amedê û rêxistinên civakî û demokratîk beşdarî kongreyê bûn. Kongreyê bi hilbijartina dîwanê û ji bo kesên ku di têkoşîna azadî û demokrasiyê de jiyana xwe ji dest dane bi deqeyek rêzgirtinê dest pê kir. Ewil ji Buroya Hiqûqê ya Asrinê Parêzer Mazlûm Dinç axivî û bal kişand ser êrîşên li ser Bakûr û Rojhilatê sûriyeyê. Mazlum Dînç, anî ziman ku polîtîkayên bişaftin li ser kurdan ferz dikin û got: “Komkujiyê û bişaftinê li gelê kurd ferz dikin. Her roj rîşên polisan bi awayekî hişk zêde dibin. Her roj xwezaya me talan dikin. Êrîşên li ser jinan her roj zêdetir dibin. Pêwîste li dijî wan polîtîkayên qirkirin û talankirinê têkoşîneke hiquqî ya xurt bê meşandin. Politikaya tecrîtê hêj berdewam dike. Em nikarin bibêjin tecrîd bi dawî bûye. Li Rojhilata Navîn pêvajoya şer xetertir bûye. Di salekê de zêdeyî 50 hezar mirov hatin kuştin. Rêberê PKKê Abdullah Ocalan ji bo çareseriya pirsgirêkan xwedî proje ye.”
‘Li li dijî tecrîdê têdikoşin’
Hevseroka Giştî ya OHDê Ekîn Yeter jî anî ziman ku tecrîda li ser Rêberê PKKê Abdullah Ocalan berdewam dike û wiha got: “Ev hevdîtinên ku heyeta DEM Partiyê dikin nayê wê wateyê ku tecrîd ji holê rabûye. Em ê wek hiqûqnasan ji bo ku tecrîd rabe têbikoşin. Li Rojava bi hişmendiya DAIŞê êrîş berdewam dikin. Ji bo ku gelê kurd nebe xwedî statu çi ji destê wan tê dikin. Di pêvajoya xwerêvebirinê de bajarên me şewitandin. Gelê me kuştin. Niha jî êrîşên desthilatdariyê li ser gelê me berdewam dikin, rojane siyasetmedar, rojnameger tên binçavkirin û girtin. Em li welatekî ku nasnameya me nayê naskirin û qebûlkirin dijîn. Em têkoşîna nasname û avakirina hiqûqa azadîxwez didin”
Êdî Bes e
Hevseroka DBPê ya Amedê Sultan Yaray jî diyar kir ku li Tirkiyeyê êdî hiquq nemaye û got: “Faşizm bi her avayî pêş dikeve. Ew ji dizanin ki kurd êdî ne kurdên bere ne. Desthilat her roj li Rojava sivilan dikuje. Êdî bes e, hûn nikarin gelê kurd tunne bikin.”
Çareserî berxwedan e
Hevserokê OHDê yê berê Riza Polat jî anî ziman ku tu roj nîne ku gelê kurd bi zilmê re rû bi rû namîne û got: “Gelê kurd her tim rastîzilm û zordariyê hat. Jî bo kurdan êdi careserî berxwedan e. Em ê di vê kongreyê de berxwedana xwe mezin û xurtir bikin. Em ê bi ziman û rastiya xwe ve her tim li qadan têbikoşin”
Kongre bi hilbijartina rêveberiya nû û govenda dawî bû. Şaxa OHDê ya Amedê dê piştî civînê hevserokên xwe diyar bikin.
