Şaredariya Rezan a Amedê bi xebata “Budçeya Gel” modeleke nû ava dike û dibe mînak. Bi vê xebatê gel rasterast xizmet û projeyên ku li taxan bêne kirin bi xwe diyar dike.
30 sala berê li Porto Alegroyê ya Brezîlyayê cara yekem bi projeya “Budçeya gel”, gel beşdarî pareke bûtçeya şaredarîyê bûn. Daxwazên xwe bi wê budçeyê pêk anîn. Şarederîya Rêzanê ya Amedê jî modela Porto Alegroyê ji bo xwe kir mînak. Ji ber qeyûman şaredarî ji destê gel derketin. Piştî hilbijartian 2024an, şaredarî dîsa ketin destê gel. Hevşaredarên ji aliyê gel ve hatin hilbijartin dest bi projeyan kirin. Li Tirkiyeyê cara yekem Şaredarîya Rezanê modela “Budçeya gel” xist meriyetê.
‘Pêşîyê me xwe perwerde kir’
Kordînatorê xebata budçeya gel Sedat Yildiz der barê xebatê de agahî dan û got. “Ji bo rê û rêbazên wê xebatê me pêşîyê pirtukek amade kir. Di pirtukê de tişta em dixwazin çi bikin yek bi yek me nivîsî. Me di serî de ev xebat ji xwe de da destpêkirin. Me xwe perwerde kir. Me bi atolyeyan dest bi xebatê kir. Ev yekîne di bingeha şarederîyê de hate avakirin. Ew xebate kolektife û hemû şaredarî di wê xebatê de cîh digire. Di dawîya gulanê xebata me bi fermî dest pê kir. Piştî perwerdehî qediyan xebata me dest pê kir. Di 7 kesan di kordînasyonê de cîh girtin.”
‘Me civînên gel pêk anîn’
Sedat Yildiz li ser pêvajoyê û civînên gel jî agahî dan û wiha lê zêde kir: “Ev xebate piştî 4 civîn, pêvajoya hilbijartinê û avakirina komisyona pêk hat. Me di hevdîtina ewilî de xwest xebatek çawa bimeşînin bi gel re parve kir. Me nîqaş pêş xistin. Di civîna duyemde de me li daxwazên gel guhdar kir. Me xizmetên ku şarederî bike anîn ziman. Di civîna sêyemîn de me daxwazên gel niqaş kirin. Pişti daxwazan di civîna dawî de me pusula ava kir. Ji bo du taxên cuda, me li 7 nokteyên cuda dindoqên hilbijartinê danîn. Kesên ji 12 salî mezintir hemûyan reyên xwe dan. Di encamê de li taxa Kaynar Tepe 3 proje pêş ketin Li baxcilarê jî 3 proje bi giştî 6 projeyê dê 2026an de têkevin meriyetê. Niha proje di pêvajoya komîsyonê de ye. Ji serê avakirinê heta dawî biryar komîsyon didin. Komîsyona li ser navê gel biryarê dide, ji serî heya dawîyê di xebatê de cîh digire. Dîsa gel ji serî heta dawî di nava xebatê de ye.”
‘Şêniyê taxê ji tîryakê bi gazinc in’
Sedat Yildiz li ser xebatên hilbijartinê yên ji bo budçeya gel jî rawestiya û ev agahî dan: “Her tax li gorî pêdiviya xwe tên hilbijartin. Li taxê Kaynartepe pirsgirêka tîryakê heye. Welatî pirr ji firotin û bikaranîna tiryakê bi gazinc in. Li Kaynartepeyê 60 ray ji bo projeke dijberî tiryakê hat dayîn. Projeya duyem pirtûkxane bû. A sêyemîn jî parka lîstikê ya ji bo zarokan bû. Li taxa Baxcilarê projeya yekem hawiza avê bû. Daxwaza duyemîn pirtûkxane û ya sêyemîn jî park bû. Em bang li gel dikin ku tev li xebatê bibin û di komîsyonê de cih bigirin.”
