Komeleya Rojnamegerên Jin a Mezopotamyayê (MKG), DFG û DîSK Basin-Îşê bi daxuyaniyekî hevpar bertek nîşanî astengiyên li ser hesabên medyaya dîjîtal ên JINNEWS û NûJINHAyê dan û diyar kirin ku ev destwerdanek eşkere ye li ser azadiya çapemeniyê ye.
MKG, DFG û DÎSK Basin-İş bi daxuyaniyekî hevpar bertek nîşanî astengiyên li ser hesabên medyaya dîjîtal ên JINNEWS û NûJINHAyê dan. Di daxuyaniya hevpar de hat destnîşankirin ku zextên li ser çapemeniya jinan bi astengiyên li ser qada medyaya dîjîtal têne domandin. Saziyên pîşeyî anîn ziman ku piştî hesabên medyaya dîjîtal ên JINNEWSê, astengkirina hesabên ajansa nûçeyan a jinan NûJINHAyê jî wekî destwerdaneke eşkere hatiye dîtin.
‘Mekanîzmeyeke sansûrê ye’
Rêxistinên rojnamevanan dan xuyakirin ku rojnamevanên jin bi salan in bi binçavkirin, girtin, vekiriina doz û astengkirina şopandina nûçeyan re rû bi rû ne û wiha gotin: “Di dema dawî de astengiyên li ser platformên medyaya dîjîtal jî li van polîtîkayên zextê hatine zêdekirin. Rakirina naverokên nûçeyan û astengkirina gihîştinê vediguhere mekanîzmeyeke sansûrê ku armanc dike pêşî li xwe gihandina agahiyan a civakî bigire.”
Banga rakirina astengiyan
Di dawiya daxuyaniyê de hate xwestin ku sepanên astengkirinê yên li ser çapemeniyê werin bidawîkirin û astengiyên li ser hesabên medyaya dîjîtal ên JINNEWS û NûJINHAyê were rakirin.
