Salih Muslim destnîşan kir ku êrişên li dijî taxên Kurdan û Dêr Hafirê bi piştgiriya Tirkiyeyê pêk tên û got: “Dêr Hafir ji bo me cihekî stratejîk e. Wê HSD bi hêsanî vir bernede.”
Çeteyên HTŞê û SMOyê piştî taxên Şêxmeqsûd û Eşrefiyê niha jî êrişî Dêr Hafir û derdora Bendava Tişrînê dikin.
Endamê Konseya Hevserokatiya Partiya Yekîtiya Demokratîk (PYD) Salih Muslim têkildarî êrişên li ser Bakur û Rojhilatê Sûriyeyê ji Ajansa Mezopotamyayê re axivî.
‘Tirkiye û rejîm bi hev re êriş dikin’
Salih Muslim diyar kir ku rewşa li Bakur û Rojhilatê Sûriyeyê ne diyar e û got ku piştî tiştên li Şêxmeqsûd û Eşrefiyê qewimîn, gel pir hêrs bûye û bertek nîşan daye. Muslim her wiha behsa amadekariyên êrişa li ser Dêr Hafirê jî kir û got: “Tirkiye û rejîma Şamê bi hev re dixebitin. Gundên Dêr Hefirê tên topbarankirin. Her wiha êriş li ser Bendava Tişrînê jî hene. Ji ber vê yekê rewşeke tevlihev heye û em nizanin ew ê bi ku ve biçe.”
‘HSD dê li Dêr Hafirê şer bike’
Salih Muslim anî ziman ku ew ê bi her awayî xwe li dijî dijminên xwe biparêzin û got: “Dêr Hafir ji bo me cihekî stratejîk e. Ez nafikirim ku HSD bi hêsanî wê berde. Şêxmeqsûd herêmeke biçûk bû û li wir kesek ji HSDê tunebû. Tenê hêzên ewlehiyê hebûn. Lê li deverên din, HSD li wir e û dê şer bike.”
