Kedkarê Çapemeniya Azad Mazlûm Erencî di 15emîn salvegera şehadeta xwe de li ser gora xwe hat bibîranîn. Hempîşeyê wî Mehmet Alî Ertaş di bîranînê de axivî û got ku ew ê têkoşîna xwe berdewam bikin.
Komeleya Rojnamegerên Dicle Firatê (DFG), kedkarê Çapemeniya Azad Mazlûm Erencî yê ku di 29ê Hezîrana 2011an de di şerekî li gundewarê navçeya Çemîşgezekê ya Dêrsimê de jiyana xwe ji dest dabû bi bîr anîn. Malbata Erencî, hempêşeyên wî, nûnerên saziyan û siyasetmedar beşdarî bîranîna li Goristana Yenîkoyê ya navçeya Rezanê ya Amedê bûn. Beriya bîranînê gora Mazlûm Erencî bi kurdeleyên kesk û sor û zer û gulan hat xemilandin. Piştre girseyê ji bo şehîdên Çapemeniya Azad deqeyek rêz girtin.
‘ Çapemeniya Azad têkoşîna nifşan e’
Di destpêkê de Hevserokê DFGê Selman Çîçek axivî û got: “Me duh kedkarê Çapemeniya Azad Bayram Balci li Enqereyê spart axê, her wiha em çûn ser gora Huseyîn Aykol û îro jî em Mazlûm Erencî bi bîr tînin. Her sê hevalên me jî nûnertiya nifşekî dikirin. Gava em dinêrin, em dibînin ku Çapemeniya Azad têkoşîna nifşan e. Mazlûm li her devera ku diçûyê bi kenê xwe hîn dikir. Em careke din soz didin wî û şehîdên Çapemeniya Azad. Em ê mîrateya têkoşîna ku wan daye ser milên me biparêzin û berdewam bikin.”
‘Xebatkarên Çapemeniya Azad riya me ronî dikin’
Rojnameger Mehmet Alî Ertaş ê ku bi Mazlûm Erencî re xebitîbû jî wiha axivî: “Mazlûm yek ji rojnamegerên herî ciwan bû. Rojnamegerî baş nîşan dida. Kesekî pir çalak û jêhatî bû. Di çarçoveya çalakiyên jêkirina por de ku ji bo Rêberê Gelê Kurd Abdullah Ocalan hatibû destpêkirin, wî jî porê xwe jê kiribû. Ji ber ku yek ji zarokên ku kevir avêtibû polîsan bû, doz li wî jî hat vekirin. Piştî ku 9 mehan di girtîgehê de ma, rojnamegerî kir. Ji ber cezayê ku lê hatibû birîn, tev li nav refên gerîla bû. Li Dêrsimê jiyana xwe ji dest da. Xebatkarên Çapemeniya Azad riya me ronî dikin. Em li vir soz didin wî, em ê ala ku wan li pey xwe hiştiye hilgirin.”
‘Ew şehîdên me ne, rûmeta me ne’
Herî dawî dayîka Mazlûm Erencî, Remziye Erencî axivî. Remziye Erencî pêşî bixêrhatina kedkarên Çapemeniya Azad kir û got: “Mazlûm hevalekî kedkar û xebatkar bû. Mazlûm bi gotinan nayê vegotin, ji bo naskirina wî divê mirov bi wî re bijiya. Çendî xemgîn bim, ewqasî jî bi wî serbilind im. Ew şehîdên me ne, rûmeta me ne. Em ê li pey keda wan bin. Heta ku em dayîk sax bin, em ê bibêjin; aştî.”
Piştî axaftinan rojnameyên Azadiya Welat û Yeni Yaşamê danîn ser gora Mazlûm Erencî. Bîranîn bi danîna qerenfîlan û xwendina duayan bi dawî bû.
