* Hevserokê Giştî yê ÎHDê Cîhan Aydin diyar kir ku tevî zêdetirî 2 meh bi ser erêkirina qanûna çarçoveyî re derbas bûye jî ji bo pêkanîna qanûnê gaveke şênber nehatiye avêtin û got: “Ji bo ev pêvajo bi awayekî serkeftî encam bigire, divê deriyên Îmraliyê bên vekirin. Divê astengiyên li pêşiya birêz Ocalan û civakê bên rakirin.”
* Yek ji fermandarên YBŞê Kurtay Şengalî derbarê pêvajoya girîng a entegrasyona demokratîk de axivî û diyar kir ku ev pêngav ne teslîmiyet, berovajî wê tevlibûn û serkeftineke mezin a civaka Êzidî ye.
* Welatiyên Wanê yên ku tev li mewlûda cangoriyên têkoşîna azadiyê bûn anîn ziman ku wan bi saya têkoşîna şehîdan hebûna xwe parastiye û wiha gotin: “Azadiya fîzîkî ya Rêberê Gelê Kurd ji bo pêşketina pêvajoyê pêwîstiyek e.”
* Endamê Komîsyona Plan û Budçeyê ya Meclisê parlamenterê DEM Partiyê Kamuran Tanhan destnîşan kir ku weke her sal îsal jî herî zêde budçe ji şer re hatiye veqetandin û wiha got: “Ji bo kedkar, karker, jin û tevahî civakê ev budçe budçeya fetisandinê ye.”
* Serokê Komeleya Şêx Sêîd Kasim Firat derbarê komeleyên li ser navê eşîrtiyê ku bi destê desthilatê tên avakirin diyar kir ku ev yek projeyeke avakirina Komara Tirkiyeyê ye û îro dixwazin eşîran ji bo berjewendiyên xwe veguherînin şêwazek nû.
* Aborînas Emre Şîrîn derbarê krîza fonan de diyar kir ku welat di nav krîz û sosretiyek mezin de ye ku bandorê li tevahiya aboriyê dike û wiha got: “Tê gotin ku meseleya fonan bi 18 milyar dolarî ye. Lê dema tu dinêrî, meseleya borsayê ji pirsgirêka fonan gelekî wêdetir e. Behsa windabûneke ku gihîştiye 150 heta 160 milyar dolarî tê kirin. Dema ku hin kes talanê dikin, hema hema hemû welatî di qada aboriyê de dikevin rewşa windakirinê. Heta ku rewşa siyasî neyê ser rê, hûn nikarin pirsgirêkan çareser bikin.”
* Welatiyên ku li Dêrika Çiyayê Mazî bi kar û barê zeytûnan ve mijûl dibin ji ber bihaya zeytûnan a erzan bi gazinc in. Welatiyan ku dest bi hilberîna zeytûnan a îsal kirine diyar kir ku ew nikarin debara xwe bi zeytûnan bikin.
* Li Wanê fatûreyên avê welatiyan dixe nav tengasiyeke dijwar û welatî ji ber vê yekê mislixên xwe bi tirs vedikin. Welatiyên ku bertek nîşanî rêveberiya qeyim dan, anîn ziman ku VASKÎ bûye xwînmêj.
* Girtiya nexweş Felem Aker a ku di Girtîgeha Tîpa Tyê ya Wanê de tê ragirtin, tevî gelek nexweşiyên giran û metirsiya tenduristiya wê jî heye nayê berdan. Hevjînê wê Eşref Aker diyar kir ku rewşa hevjîna wî her ku diçe xirabtir dibe û banga berdana Felem Aker kir.
* Mamoste û kedkarê Çapemeniya Azad Kadri Kaya dê di salvegera koça xwe ya dawî de li ser gora xwe ya li Goristana Yenîkoya Amedê were bîranîn. (13:00)
* Meclisa Dayikên Aştiyê ya Amedê dê li avahiya Şaxa ÎHDê ya Amedê derbarê Pêvajoya Aştî û Civaka Demokratîk, girtiyên nexweş û taloqkirina berdana girtiyên siyasî de daxuyanî bide çapemeniyê. (11:00)
